Search:
Advanced Search
Posted: 23/3/2011 - 6 comment(s) [ Comment ] - 0 trackback(s) [ Trackback ] - 0 Votes

اي منكمل ومع نووووووور نورت والله

و طبعاً نفس الناس المتحمسين والضايجين  كرمال لميس ويحيى بسنوات الضياع.. كمان مو جايهم قعود مشان أم النور... نور وجوزها المذبذب مهند... يلي ما صدقنا خلصنا من عابدين عشيق نور يلي كان شريكها  بالشغل وكان حاطط عينه عليها من أول ما شافها وصار يسرق منها حلقاتها وموبايلها ويبوس قمصان نومها!!..قولوا الحمدالله مات ..أساساً كل مين تابع المسلسل اشتهى تفوت شي كم رصاصة بقلبه لهالحقير عابدين.. والكل كان يقول.. والله تيم تبع سنوات الضياع وعابدين تبع نور بدهم مين يقتلهم ع الخالص.. وكل مين شاف كم حلقة صار ناره وانتقامه هالاتنين عابدين وتيم يلي صار الشباب والبنات بدها تشرب من دمهم على قد مابتكرههم أكتر مايكرهوا بوش وشارون بعز وحشيته.

المهم بعدين مات عابدين وقلنا الجماعة (نور مهند) استقروا وخلصت مشاكلهم آم طلعنا السيد مهند بقصة جديدة مع أم ابنه نهال يلي مو قادرة تنساه المسكينة ويلي رجعت تمشي خلال كم مشهد بقدرة قادر وبحبكة  إخراجية مهترئة... المهم يبدو أن القصة كبرانة.. لأنو مهند كان سكران وراح لعند نهال ع البيت وعلى حد قوله انو هي يلي (قبلته) بالأول وبعدين ما عاد اتذكر المسكين  شو صار وهالبوسة صارت حديث الناس لك حتى الولاد صارت تحلل الموضوع وتسأل بعضها يا ترى صار شي بينهم لما مجرد بوسة ؟..حاكم نهال ومهند جابوا مهند الصغير هيك من ورا لحظة حب كمان الله يستر ما يكون صار شي وتقوم تحمل نهال مرة تانية من مهند ويضطر يرجع يتجوزها ..مشان النسل مايضيع..

أي كمان مهند إلو تلتين الخاطر بيلي صار.. إي كان وشّو يصير متل الدم لما يشوف نهال عم تبوس رفيقها بالشغل أي شكله لسه بغار عليها وطار عقله لما كانت لابسة فستان أحمر مشلح .. مع إنو نور ما قصرت ولبست وترتبت كرماله.. بس هو عينو صايرة زايغة.. من يوم ما نور جابتله البنت وصارت تحضنها بدل ما تحضنه بالليل طق عقله...

 المهم ما يصير معهم متل ما صار  بين دانا إخت مهند وجوزها ( يلي كان عشيقها ) وقت كانت بأميركا وجابوا البنوتة ذات الوجه البشوش الطفلة (ألما)... قولوا بعدين تجوزا مشي الحال.... مع انه التاني مو قليل خانها مع وحدة بالشغل بتكون اخته لجوز بانا كمان  بس أنور حلف ميت يمين وعظيم أنو ما خانها وأنو هي البنت حاولت معه بس هوي ما تجاوب .

وعلى فكرة محسوبكم وحياة تراترو ع الغالي مو متابع ولا حلقة وكل شي قلته بعرفه من حكي الناس يلي بسمعه وأنا  راكب بالباص أو الميكرو  وأنا عم بشرب قهوة بالكافتيريا وأنا عم اتغدى بالمطعم وأنا ا عم زور أقاربي أو رفقاتي أو أهلي وكل العائلات المحافظة وغير المحافظة يلي بعرفها حتى وأنا عم بسمع موسيقا هادية ببيتي.. لما بكونوا الجيران معلين الصوت شوي.. شوي كتير.

هي مفردات وقضايا الشعب السوري هاليومين... بربكم ناقصنا انفصام نحنا؟!

Posted: 23/3/2011 - 3 comment(s) [ Comment ] - 0 trackback(s) [ Trackback ] - 0 Votes

اي وين كنا صح تذكرت

 

وبعدين ملت الناس الدجاج المكسيكي وتوابله وحفظت قصص روزاليندا وماريمار، وماريا مرسيديس..وبلشت من فترة موضة المسلسلات التركية وهالمرة باللهجة الشامية ( تشكلي آس عدوينك يا لورا أبو اسعد على هالأستفآدة)...ونسيت الناس همها وهم الغلا يلي بيكسر الظهر وصارت تفكر أنو كيف بدهم يفهموا يحيى أبو حاجب مرفوع أنو لميس الحلوة حامل منه وأنو هو أبو ابنها مو تيم الحقير متل ما قالتله أمها الراكزة الراقية الفهمانة الأنيقة (الله يسامحها ويهديها).... لأنو الأم بدها بنتها تتجوز من تيم الأكابر وكرمال هيك راحت لعند يحيى وقالتله خلص روح من طريق بنتي هي حامل من تيم ورح تتجوزه ..... بس ع فكرة بضل قلب الأم حنون.. ومشان هيك قالتلها أمها للميس أنا معك شو ما كان قرارك سواء بدك تربي ابنك لحالك أو مع الأب يلي بتختاريه انتي بس القصة كبرانة براس  يحيى خاصة انو أم لميس عطيته ليحيى تحليل الحمل وأكدت له أنو بنتها حامل بشهرها الأول وهو ولميس صرلهم شهرين ماشافوا بعض ..بآ شلون بدو يقتنع يحيى أفندي انو هوي أبو ابن الحرام يلي ببطن لميس..

وحديث العيلة السورية اليوم على الغداء أنو شلون يحيى نسيان هالليلة يلي قضاها مع لميس بالمزرعة هداك اليوم شلون!!!

المهم من وقتها هاليحيى مو قادر يشوف حدا من بيت أبو شعر حتى لما شاف عمر أخو لميس عم يبوس فريدة جن جنونه أي هو شو دخله هالشي من حقهم مو بحبوا بعض..

بس والله هالفريدة مافي منها والكبار والصغار عم يحكوا بموقفها العظيم وقت قدمت حالها لهداك الشب يلي كان بيقربها بذاكرتها الماضية كرمال يدفع المصاري لعمر ويطلع من السجن ولبست هالفستان الزهري وقعدت على طرف التخت وقالتله خود شو مابدك بس عمر يطلع من السجن .. دخيلك.

 

يتبع.................

Posted: 23/3/2011 - 3 comment(s) [ Comment ] - 0 trackback(s) [ Trackback ] - 0 Votes

من المكسيكي إلى التركي والمزمار السوري لا يطرب

كان الشعب السوري (اضرب أنا) متعود على مسلسلين سوريين  بينعرضوا على  القناة الأولى (لأنو بوقتها ما كان في فضائيات) وكان واحد بيطلع ع السبعة ونص والتاني ع التسعة ونص ويوم الخميس كان في سهرة تلفزيونية  من إخراج هيثم حقي ... وبالعموم كان غداً نلتقي هو طقوس ما قبل النوم يلي كانت مطبقة في سوريا قبل ما تفتح قنوات تعتمد مبدأ (مافي نوم بعد اليوم)!!! .... ومشان هيك صارت صباح الخير بتنقال بعد ال12 الضهر.

بهارات مكسيكية

أول منعطف تاريخي بحياة المشاهد السوري كان  المسلسل المكسيكي كاسندرا ببهاراته الحادة التي (شلفطت ) قلوب المشاهدين شلفطة ولما كان ينعرض المسلسل كان في منع تجول في الطرقات.. لأنه العالم اعتبرته موعد مقدس فحتى الأفراح والأتراح والمباركات وأوقات الطعام والزيارات والدراسة و.. غيرها كلها مؤجلة إلى حين انتهاء الحلقة... وهالعمل ما بيعرف يخلص لبعد المية حلقة (أقل شي) إذا الخدامة السماوية روزاورا بدها (33 حلقة لتنطق هالجوهرة وتقول أنو هي واغناسيو الله يرحمه كان على علاقة غرامية  وأنو بلحظة رواق حملت ب (شابيلا)  بس اغناسيو مارضي يعترف ويتجوز روزاورا لأنو مستواه الاجتماعي أكبر من هيك ..فاتفقوا يحطوا البنت على باب الفيلا وتربى عندهم كلقيطة مدللة وشي 4حلقات بأكد أبوها للخدامة الشاهد الوحيد على علاقة بنته السرية بأغناسيو انو هالشي صار وبيتذكر هالليلة باليوم والدقيقة  وبعدين بتروح 30 حلقة تأثر وفرح وحزن وهيك شغلات كرد فعل على هالخبر يلي بيصعق العيلة  مولانو أغناسيو أول مرة بيعملها مع البنات وبيغلط ..لأ أساساً العيلة متعودة على حركاته وخبصاته بس الصدمة انو هالمرة كتير منزل المستوى وعاملها مع شقفة صانعة... ومابيخلص هالسر ليبلش سر  تاني ويخلق خط درامي جديد بالعمل لا محبوك ولامدروس متل يلي قبله (وبوقتها كنا ننشر عرض المسلسل السوري إذا كان أكتر من 30حلقة)..المهم وكانت الناس تتفاعل مع الأحداث وكأنه عم تصير ببيتها وبتلاقي الأم وبنتها عم يفكروا بحل وعم يدعوا أنو لويس دافيد يطق كاسندرا بوسة مشان تعرفه مين هو من بوسته وتميزه عن هداك الخاين أخوه يلي مات قتل على إيد عشيقة من عشيقاته... وبتلاقي حديث العيلة وسمة بدنها أنو نورما عشيقة اغناسيو والمحامي يلي بحب كاسندرا مع أنها مرت (زوجة) رفيقه  بيتغالظوا على كاسندرا وأغناسيو وبضلوا معهم بالشاليه وما بتركهم يختلوا لحالهم !!

 

يتبع..................

Posted: 21/3/2011 - 5 comment(s) [ Comment ] - 0 trackback(s) [ Trackback ] - 2 Votes

ست الحبايب يا حبية

من الصبح معجوق ومخفوق ..وانت تشتري الكاتو ومجموعةنواشف على ذوقك ..كلو جاهز كرمال سفرة اليوم ...كلو جاهز بلاماتتعذب الوالدة اليوم عيدها خليها ترتاح...وانت في السيارة وعلب الحلويات والمأكولات (حولك وحواليك) بتطلع على الراديو اغنية ست الحبايب ياحبيبة يا اغلى من روحي ودمي ياحنينة وكلك طيبة يارب يخليكي يا امي يارب يخليكي يا امي يا ست الحبايب يا حبيبة ..حبيبة

طبعاً تتاثر ولا تستطع إكمال الاغنية وعيونك تتدمع ..بس صف عاليمين شوي واصفين معنا وارجعلي بذاكرتك  شوي لورا..بتتذكر

أديشك  كفو ...ومين ماطلب وشوماطلب..مباشرة بدق  إيدك ع صدرك وعلى كفونة لك انت إذا اتصل صديقك وطلب منك بعز العجقة  او البرد أو التعب أو المرض ..ان تساعده في نقل  عفش بيته القديم إلى منزله الجديد..ركضت بإيدك ورجليك وبفرح وسروروسعادة ونخوة وكفونة وعلىقولة (له يازلمة ديبك انا)...وفي المقابل كلما طلبت منك الوالدة شي طلب بصير الديب اسرعلها ..بتتذكر لماكانت تطلبت منك أن ترمي بالزبالة خارج المنزل (يعني تكب سطل الزبالة) كنت ومازلت تستشيط غضباً ، وتصرخ محتجاً (ياالله..يالله ..شومافي غيري بهالبيت ..لكون زبال البيت ومو دريان) وعلى هف وأوف ..

ويارب يخليكي يا امي يا ست الحبايب  يا حبيبية!!

 

.

.

.

.

لأن مشاعرنا باتت مقيدة بتقويم سنوي تقليدي شائع..اصبحنانبتسم بتاريخ محدد ونحب ونغرم وننصبغ باللون الاحمر الوردي الأرجواني بتاريخ محدد،ونزرع الشجرة في تاريخها المحدد،  ونصدق ونتصادق في تاريخ محدد،ونتحررفي يوم معين، ونكنس الشارع في يوم معين ، ونمنتنع عن التدخين في تاريخ معين ،ونزرع الياسمين بوقت محدد،ونتالم بوقت محدد ،ونفرح بعيد معين و...و..وفي وقت محدد من العام حسب التوقيت المحلي..أكشن..  امسيات الواحد والعشرين من شهر آذار يعني ليلة عيدالأم كل عام وأنتوا و امهاتكون  وامهاتنا بالف خير.

.

.

.

اجمل الأمهات

اجمل الأمهات  التي انتظرت ابنها ...

اجمل الامهات التي انتظرته

وعاد مستشهداً...

فبكت دمعتين ووردة ...

ولم تنزوٍ في ثياب الحداد...

 

 

Posted: 19/3/2011 - 4 comment(s) [ Comment ] - 0 trackback(s) [ Trackback ] - 1 Votes

أمي يا ملاكي

لا تستطعين حبس دموعك ..ولا خنق تاثرك الشديد في مثل هذا اليوم العظيم ..وتعترفين أمام جميع اخوتك وزوجاتهم وامام عائلتك الجديدة من زوجك واطفالك أن أمك سبب نجاحك في هذا الحياة وأن لولا امك لماكنتي أماً ناجحة وزوجة مميزة وطباخة ماهرة ومدرسة انكليزي شاطرة..وبينما تمسحين دموعك بيدك اليمنى ترتبين على كتف والدتك بيدك اليسرى وتؤكدين انك خصصتي لأمك نغمة على الموبايل ..تلخص مشاعرك (وبتشغلي الغنية يلي هي ): امي ياملاكي يا حبي الباقي إلى الابد  لاتزال يداكي ارجوحتي ولا ازل ولد.  بلامقطوع عن تاثرك ممكن ترجعيلي بذاكرتك فلاش باك شوي...بتتذكري لما كنتي ومازلت مؤمنة ان كل الناس ممن حولك يريدون ويعرفون مصلحتك تماماً باستثناء امك ملاكك ..لانها دقة قديمة حسب وصفك ..وبالتالي لاتجيد لغة الحياة العصرية الحالية ،ولذلك كنت ترفضين حتى الاستماع لوجهة نظرها أو رأيها مثلاً: يا امي هالشغل مابناسبك    وقبل أن تكمل جملتها ترددين : أي انتي شو عرفك أمي، سالت والكل قلي هالشغلة منيحة إلي. وأمي ياملاكي ...

 

Posted: 16/3/2011 - 7 comment(s) [ Comment ] - 0 trackback(s) [ Trackback ] - 1 Votes

اتفقتم واجتمعتم وجمعتم مبلغ ظريف ومرقوم انت واخوتك وفاجأتم والدتكم بهدية كبيرة معتبرة ومحرزة ..أملاً بأن تفرّحوا قلبها وتنعشوا امومتها وتنالوا رضاها الذي بدا ينهال من اول مابلشتواتتوافداو واحد تلو الآخرأنت واخوتك ..وعالتلفاز يلي بوسط الصالون ببيت والدتكون الحنون كانت أغنية (ست الكل ياغالية علي يا اغلى من ضي عيني على صوتك فتحت عيني وبحضنك شفت الحنية ) بداالجميع بالتأكيد التمايل مع لأغنية وترديد عبارات أي والله من القلب ..لحظة من بعد إذن قلبك  ترجعلي بذاكرتك شوي لورا ..بتتذكر  من مطعم لمطعم ومن مكان لمكان  كنت ومازلت شاطرانت ومجتهد بفقرة الفرفشة والصرف والبحترة ...وبغض النظر عن مصاريفك اليومية في المقاهي والمطاعم والنت والتياب والكجولة ، لاتتواني عن تبيض وشوك ( اي وجهك) أمام الاصحاب والأصدقاء والمعارف والخلان..وعلى بعزءة..لكن عندما يتعلق الامربست الكل  ينقلب راساًعلى عقب ...خدني بحلمك حقلك كيف يعني.. لماكانت الوالدة  تطلب منك أن تحضر لها شي ربطة خبزعالبيت ..مباشرة بتقلها التسعيرة وبتحسبلها الطريق روحة رجعة ..واحياناً كنت تطالب بتعويض عطل وضرر ....ومهماحاولت يا امي أوفي كل العمر ده مش حيكفي لحظة حب وعطف عليّ ست الكل ياغالية عليّ!!

 

Posted: 12/3/2011 - 9 comment(s) [ Comment ] - 0 trackback(s) [ Trackback ] - 2 Votes

انتكبتي وافلستي وماضل معيك مصروف واختي دفعة  من راتبك في العمل حتى تجيبي لوالدتك الهدية المعتبرة ..وفي سهرة الحادي والعشرين من آذار تحتضين والدتك وتستمعين لاغنية مؤثرة وراقية..(أحن إلى خبز امي..إلى قهوة امي وتكبروا في الطفولة يوماً على  صدر امي..امي واعشق عمري لأني إذا مت أخجل من دمع أمي ... من دمع أمي)أي ستوب ورجعيلي بذاكرتك فلاش باك لورا..قبل ماتخجلي من دمع امك وأمي  تتذكري كيف كانت ماتحلالك الدراسة إلا بهديك اللحظةالحاسمة (ياعلى قطاطك)عندماكانت امك تطلب منك بعد (تؤبؤيني وتكفنيني) أن تجلي لها الجليات ...مباشرة كنتي تقفزي من ارضك وبتحملي كل الكتب والمحاضرات يلي الله بيقدرك عليهم وتصرخين ...(عندي دراسة عندي دراسة شو بدك ياني ارسب مشان كم صحن يعني بتنبسطي امي بتنبسطي)..وإذا واجهتك بحقيقتك المرة وصرخت في وجهك: صرلك ساعة عم تحكي عالتلفون وساعة آعدةعالنت وساعة عم تتفرجي عالتلفزيون ..هلأ صرتي شاطرة)..مباشرة يكون التبرير واضح جاهز مقنع(عم برتاح ..عم بتنفس ،عم غير جو ، شو موت إنشالله واخلص)..ومن الطبيعي ومن المنطق الدرامي ان تنتهي القصة ببعيدالشر...والمقصود به الموت بالنسبة للوالدة والجلي بالنسبة لك.واحن إلى خبز امي وقهوة أمي ولمسة امي .اااااااااخ منك يا ئطة شو مرضيةةةةةةةة موووووووووووو

 

Posted: 10/3/2011 - 8 comment(s) [ Comment ] - 0 trackback(s) [ Trackback ] - 0 Votes

بما انو قرب عيد الام وكل عام وكل الامهات بالف خيرررررررر

رح نعمل دق بريك من تضرب شو كريك لمدة 10 يام

 

وموضوعنا بهل 10 ايام عن عيد الام

هلاء انت مامعك كتير من المصاري ... دبرت راسك واشتريت باقة ورود صغيرة ومعبرة لامك في هذا اليوم ..وانت وسط اخوتك والكل نازل تقبيل وتمجيق بالست الوالدة تاخذكم هذه اللمة والجمعة الحلوة إلى ذكريات الطفولة وكنوع من الهضامة وبتبلش أنت واخوتك تنشدون اغنية كانت مقررة في الكتب المدرسية ألا وهي (ماما ماما يا أنغام تملأ قلبي بندى الحب ...أنت نشيدي وعيدك عيدي ..بسمة أمي سر وجودي....افتح عيني عند الفجرفأرى ماما  تمسح شعري اهوى ماما أفدي ماما!!) ولانو قلب ست الوالدة يا حسرتي انا ستمتلأ عيني والدتك بالدموع وستتاثروا جميعاً دون استثناء ..بس لحظة من بعد إذنك ممكن ترجعلي بذاكرتك فلاش باك لورا ..اي أنت تحديداً..بتتذكرلماكنت تمضي وقتك الثمين (المعجعج) مع رفقاتك الشباب في المقاهي والكافتيريات والحدائق وعلى اسطحة بيوتهم وبلاكين غرفهم ...وعلى قهوة وشاي وقرقعة متة ، ودخان واراكيل ..وفضفضة هموم وفصفصة بزر،وضحكة ونكتة وطقطقة براغي ،وأحلام وآهات وتمزقات ..وبالتالي تمضي ساعة اتنين اربعة وانتو مابتحسو بلوقت بركض الوقت وهرولته وجريانه..بس لما غلطت امك واتصلت فيك وطلبت منك طلب بغض النظرعن حجمه كبير اوصغير أو فتفوت ، مباشرة كان ردك جاهز :( ماخرج ..ماخرج امي ..ماعندي وقت مابقدر...وين هالأدفة لك أمي ...لاااا امي يستر على عرضك شوفي غيري ..أنامو فاضي).افتح عيني عندالفجر فأرى ماماتمسحي شعري اهوىماما افدي ماما مو هييييييييييك يا مرضي

Posted: 9/3/2011 - 10 comment(s) [ Comment ] - 0 trackback(s) [ Trackback ] - 0 Votes

اخي المواطن،بعرف انو هالحكي ما رح يعجبك بس بدي بق هالبحصة بقا،يعني لما يرن موبايلك بالمكرو او بمكان عام تاني .. انو ليش لازم ضل نص ساعة عماسمع رنة موبايلك الرهيبة يللي اخدا من رفيقك بالبلو تووث ؟ انو لما تعد تصفن بالموبايل و هوه عميرن بشو بتكون عمتفكر .. عمتهجي الاسم ولا عمتتبحر بالابعاد الفلسفية لرنة الموبايل و علاقت...ا بالتواصل الانساني.. بكل الاحوال حطو صامت لبين ما توصل لمبتغاك التأملي،ببلاش ... والله

Posted: 9/3/2011 - 5 comment(s) [ Comment ] - 0 trackback(s) [ Trackback ] - 0 Votes

عندما ترى عمو سائق التكسي يركن سيارته فجأة أمام احدى الحدائق في يوم ربيعي مشمس، ويقفز فوق السور ليتنقل بين الاعشاب الطرية وازهار الاقحوان كأليس في بلاد النقانق، ويجري بين الاشجار باحثا عن ظل وارف، لا تفكرو جن ولا عميعمل فيديو كليب لاغنية لحن الحياة .. بس المسكين ما عندو حمام بالبيت .. شفيتم معلم

Posted: 6/3/2011 - 14 comment(s) [ Comment ] - 0 trackback(s) [ Trackback ] - 4 Votes

اعشاب 1 :و انا عمتابع بعض محطات الاغاني الخيلة عالنايلسات لفتلي نظري ظاهرة جهابذة الاعشاب يللي احياناً بيطلعو بدعايات مباشرة واحيانا بشريط اخباري و كللون دكاترة..مسلان الدكتور مزيريب الهواش من الدويلعة عندو اعشاب لعلاج المغص والقرحة وتطويل الاضافر وتقصير الشعر بدون شمع والسل والايدز والهارد ديسك والسرطانات والبواسير وزربان المواسير وشلل الاطفال وغيرا ،لك حتى الغباء بيعالجو، اي شوهاد يا دكتور شفلك عشبة للعين..مشانك

Posted: 4/3/2011 - 8 comment(s) [ Comment ] - 0 trackback(s) [ Trackback ] - 0 Votes

من اهم المواقف يللي بتعبر عن سرعة بديهتك بتتجلى
لما تكون عمتحكي عالموبايل مع حدامن اهلك ..لانو اهلك ما بيهمون يعرفو
حالتك النفسية واخبارك العاطفية، مشان هيك بيطبشو السماعة بخلقتك بعد ما
يسألوك ايمتى راجع عالبيت.. بقى ازا بعدت الموبايل عن ادنك كانو شي حدا
سفقك كاسة مي من السماعة بتكون بديهتك 0 او نص باحسن الحالات، اما......
الكريك سريع البديهة بيتدارك الموقف وبيكمل حديث وهمي.. اي تمام،خلص مو
مشكلة، اهلين مع السلامة

Posted: 27/2/2011 - 11 comment(s) [ Comment ] - 0 trackback(s) [ Trackback ] - 0 Votes

عمو بياع الملابس هوه اكتر شخص محترف طنبرة بالعالم،ازا الواعة صغيرة بيقلك بترخي،وازا كبيرة بيقلك هادا بيكش عالغسيل،وازا لونها فاقع بيقلك فتحتلك لونك اكتر من فير اند لفلي وازا غامقة بيقلك جابت هيبتك اكتر من قداحة الزيبو وازا كنت سمين لابستك لبس ولو كنت متل الفيل بالقنينة،وازا سنكوح بيمتدح رشاقتك وبيثني عقدك المياس لو طلعت فيها متل الشلمونة بابريق اب شاكر.ودائماً بيقبل بالسعر تبعك مع انو والله العظيم باقل من رسمالها!

Posted: 27/2/2011 - 13 comment(s) [ Comment ] - 0 trackback(s) [ Trackback ] - 2 Votes

هلق استخدمت مهاراتك البرمجية الخارقة وقعدت عالكمبيوتر وقطعت غنية مديحة العبدلله الجديدة عالجت اوديو او الغولد ويف، وبعتتها لرفقاتك مشان يتناقلوها عالموبايل وتبث اجواء الفرح في مواصلاتنا العامة،وسميت المقطوعة على اسمك الحركي دي جي فهد. امر الله. بس رقم موبايلك ليش بتحطو باسم المقطوعة؟انو شو بدك؟ يعني حتدقلك سندريلا تعا ...تجوزني ومسامح بالفردة؟ولا حيجيك عقد عمل من السعودية محل الديجي فيصل؟

انضب تضرب شو كريك صعي


« Last Page  |  viewing results 1-15 of 62  |  Next Page »