> > كيف بتعرف إنك بالشام
> >
> > ـ لما بتمشي بالشارع وبتلاقي بني آدم عم ينط من فوق الأسوار مع انو الجسر أو النفق يا دوب عشر أمتار قدامو، بتعرف انك بالشام .
> >
> > ـ لما بتلاقي شرطي المرور ماشي على الموتور بعكس اتجاه السير مشان ما يعذب حالو ويلف من الشارع التاني بتعرف إننا عم نحكي عن شرطة الشام .
> >
> > ـ لما بتركب بباص النقل الداخلي وبتلاقيه بيوسع لحد الـ 400 زلمة جلوساً ووقوفاً وتفعيساً حتى أحيانا بيخطرلك تدق لموسوعة جينيس تسجله أو لجمعية حفظ حقوق الباصات لانو لو هالباص كان الو روح كانت انتقلت إلى رحمته تعالى من زمان بتعرف انك بالشام .
> >
> > ـ لما بتلاقي المحارم والكياس وعلب الكولا وغيرو عم بينلحش لحش من قلب السيارات على الشارع مع انو الشارع يا دوب الحكومة منضفتو، بتعرف إنك بالشام .
> >
> > ـ لما بتكون ماشي مروق الصبح والعصافير عم تزقزق من حواليك وفجأة بتلاقي واحد قدامك بالشارع عم يتنخع بنص الطريق (خع تفوووووو) ، بتعرف إنك بالشام .
> >
> > ـ لما الحكومة موظفة زبالين بعدد نجوم السما ( فينا نقول زبال لكل مواطن ) شغالين على مدى 24 ساعة ومع هيك بتلاقي الشوارع وسخة والعالم عم ترمي كياس الزبالة شي من عالاسطحة وشي من الشبابيك وشي ما بتعرف من وين جاية، بتعرف انك بالشام .
> >
> > ـ لما بتلاقي زحمة عالسرافيس ولما يا دوب يعني يا دوب بتدحش حالك انت وكم زلمة بشي سرفيس ، وبعد شي حارة ولا حارتين واحد طلع معك من دقيقتين بقلو للسرفيس على مهلك نزلنا هون مع انو كان اسرعلوا يمشي من هالوقفة وهالخناق بس الافندي موجاية على مزاجو يمشيلو شي شويتين مشان هيك أخد سرفيس (وبكون وقتها طبعا اخد مطرح شي واحد متاخر على وظيفتو ولا شي طالب على جامعته ) ، بتعرف انك واقف بمواقف الشام .
> >
> > ـ لما سواق السرفيس بيوقف وين ما بدو وايمتى ما بدو مع انو في مواقف رسمية بكل شارع ، بتعرف انك بالشام
> >
> > ـ لما بتطلع الصبح وبأمان الله يعني عم تحاول تبلش نهارك بنفس مفتوحة بتلاقي اللي قاعد جمبك ريحة تمه بتخنق من الدخان ومع هيك عم بحدث ويضحك
> >
> > أو بكون آكلو شي صحن فول من عالصبح ومو نسيان يفقس براسو شي راس بصل ، بتعرف انك راكب بباصات بالشام .
> >
> > ـ لما بتكون عم تعيّش عيلة طويلة عريضة وفينا نقول عنك موظف عادي ( ما رح نقول مثالي) بس بشي شركة خاصة، وفجأة بتلاقي حالك بالشارع لان مديرك سمع حكي عنك ما عجبو كتير، بتعرف انك بالشام .
> >
> > ـ لما دكتور الجامعة بياخد راتب قد راتب الخريج العادي ، وخريج الجامعة بياخد قد راتب اللي معو باكالوريا، واللي معو بكالوريا مو ملاقي شغل، واللي معو تاسع أبوه فاتحلو شركة خاصة ، بتعرف انك بالشام .
> >
> > ـ لما بتكون معك شهادة معهد ومع هيك عندك خبرة الف مهندس ومديرك بيعرف هالشي ومع هيك راتبك يا دوب عم بكفيك اللقمة لأنو متل ما عم بقلك المعلم البلد هيك وشهادة المعهد مو قد المقام ، بتعرف انك خريج الشام .
> >
> > ـ لما بتكون رايح الصبح على الوظيفة مو عامل شي ومع هيك حاطط ايدك على قلبك وماسك وردة عم تنتف وراقها وعم تقول : يا اليوم بتقلع يا أما ما بتقلع ، يا
> > اليوم بتقلع يا أما ما بتقلع ، بتعرف انك متوظف بالشام .
> >
> > ـ لما بيقطعولك خط التلفون لأنك نسيت تدفع الفاتورة وما إجاك إنذار متل باقي البلدان تبع العالم والناس وبتروح و وشك أصفر على مركز البريد لتدفعها وأنت عم تقول لحالك : ولي على قامتي أكيد طلعت كتير عالية لحتى قطعولي ياه للخط بتقوم بتلاقي فاتورتك 80 ل.س يعني قيمة الاشتراك لا غير، بتعرف انك بالشام ..
> >
> > ـ لما بيجبروك تصف سيارتك بمرآب خصوصي مع إنو الشارع طويل عريض برة وما عليه عجقة ولاممنوع الصف فيه ولا حتى محطوط لافتة ممنوع الوقوف ، بس لإنو صاحب الكراج عاطي الشرطي قرشين وقايلو يشحط كل سيارة رح ترفض تصف عندو، وبتقول لحالك ماشي الحال الله بعيننا رح نروح للمرآب وبتلاقي انو اللي رح تدفعوا هنيك بيساوي راتب شي 6 موظفين بالشهر وبقولولك عادي هيك الأسعار، بتعرف انك بالشام .
> >
> > ـ لما بتحكي وبتحكي وبتحكي وبتحكي وما حدا بيسمعك إلا اللي ما بدك ياهن يسمعوك ) ، بتعرف انك بالشام .)
بصراحة مو بس بالشام... أنت في سوريا
3amer Alhenna عودة إلى مدونة , 'user_report.php?return_url=http%3A%2F%2Ftratro.com%2Fblog.php%3Fuser%3Damer84%26blogentry_id%3D257&TB_iframe=true&height=300&width=450', '', './images/trans.gif');){kind=spacer}
محتوى غير ملائم
