عطيتك عشق من قلبي وسلمت لغـلاك رقـاب  

   وغيـرك يحتـرق قلبـه ولا يقـدر يحاكينـي 
أنا قبلك صدفت عيون لكن ويش جـاب لجـاب  

  ترى كـل العيـون اللـي لقتنـي مـا تكفينيـ
رماني حظي العاثر عليك وجيـتلـك طـلاب  

     ولا أنتي اللي عشقتيني ولا أنتي اللـي عتقتينـي 
تعالي وارحمي ذاك الخفـوق المولـع المرتـاب  

     مهب لأجلـي عشـان الله يجازيـك ويجازينـي 
تعدي في سما عشقي ولو عشقي خراب أصحاب  

   وصوني بالهوا نفسك قبل لأنتي تصونيني
وشيليني على متنـك خفـوقٍ بـاريٍ منصـاب  

      ومن فوق الغـرام العـذب شيلينـي وحطينـي 
والا منك هقيتني شجـاع ومـا يطيـق يهـاب    

    أنا لك بالهوى والله مثـل مـا انتـي هقيتينـي 
أنا ما امشي ورا غيرك ولو انـه يطـق البـاب  

   وترى عيبٍ علي اطعن ولو كثـرت سكاكينـي 
زهودٍ مـا يطيـق الـدم لا دايـن ولا طـلاب      

  شجاع وعارفٍ نفسي وأظـن انـك تعرفينـي 
غيورٍ ما عرفت أضحك مع الغدر ببرود أعصاب

   أبيـع عيونـي الثنتيـن قبـل انـك تخونينـي 
وإذا شد الغرام أحط قلبي بين نـاب ونـاب    

     الفرق تكسـر ضلوعـي ولا عشـقٍ يوطينـي 
أنا رجلٍ ولي غيرة وإذا شفـت الهـوى كـذاب  

     تثـور بقلبـي الفزعـة ولا تهـدا شياطيـنـي 
سؤالك لو يزعزع بي كياني ما قبلـت اعتـاب  

   أجي لك وأسألك نفس السـؤال اللـي سألتينـي 
عن العشق القديم أبواب وتقفيهـا كثيـر أبـواب  

    بعد ذاك الحبيب اللي خدعنـي وانخـدع فينـي 
أبي عشق تحسب له كل نظرات العيون حسـاب  

  وأبي قلبٍ على قلبي وأبي ديـنٍ علـى دينـي 
وابي كلمة عهد توفي ولا تخلف بدون أسباب  

        وأبي منـك قبـل لا أنتي تصدينـي تودينـي 
وأبي درب ٍعلى العذال صعـب ومتعـب وغـلاب

    وأبي نفس الطريق الصعـب يبعدهـم ويدنينـي 
ترى لولا للقلوب عيون ولدموع العيـون أهداب  

       حشا ما تنـزل الدمعـة لغيـرك لـو تركتينـي 
أنا أول من عرف قدرك وأنا توي صغيــر وشاب  

 وأبي منـك مـا دام انك عرفتيـنـي تحبيـنـي 
ما دام إني لقيتك في طريق اسمه غـرام أحباب  

       دخيـل الله وبـعـد الله دخيـلـك لا تخليـنـي 
ما دام ان كل من يحيا على وجه التراب تـراب  

  عسى تنسانـي الدنيـا مـا دام انتـي ذكرتينـي

للشاعر الكبير:حامد زيد