قلي بدي خبرك كيف فاتت على حياتي وشو عملت فيا..
قلتله : اكيد فاتت على حياتك وقلبتلك الدنيا من فوق لتحت
مبين عليك مغروم مبين عليك عم تشوف الدني من منظار مختلف
قلي :صح
سكت
قلي : بتعرف شغله
في مرة كنت اعد بغرفتي
غرفتي اللي بشبها عالمي
كل شي بهالغرفة بخصني
تختي
خزانتي
صوري اللي راسما  ومعلئا عالحيط
كل شي كتبته وبفكر فيه موجود على هالمكتب
قلمي
زكرياتي بهالعلبه
تيابي
غراضي
وراقي
كل هالغرفة فيا قصة حياتي
ومرة بفصل الشتي لما كنت اعد بهالغرفة والدني برة عم تنزل مطر وعواصف ورعد وبرق
وانا عم اكتب
عم اكتب اديش حلو انه الواحد يكون حاسس حاله بامان
اعد بغرفته
بعالمه
دفيان
والدني برا حوليه فوضى كبيرة
بس ما عم تقدر توصله
حسي كأنه حدا عم يدق على شباك الغرفة
نأزت
برمت واتطلعت ولقيت الهوا عم يبرم حوالي البيت ويرجع يضرب عالشباك
قلت: شو بده هالهوا
صرت راقب كيف عم يحرك الوراق
الشجر
مي المطر عم ياخده شمال ويمين
ويرجع هالهوا يضرب بالشباك كأنه عم يقلي فتحلي بدي فوت لعندك
قربت من دون خوف ومديت ايدي عالشباك وحركت المسكه بايدي للحظة كنت متردد بس قررت وفتحت الشباك
ولما فتحت الشباك
هب الهوا
ودخل الغرفة
وفات على عالمي
طيرلي وراقي عن المكتب
طفى الشمعه اللي كنت عم اكتب على نورا
خربط مخدة وحرام تختي
وقع وراقي عالارض
خربطلي الغرفة
هيك
هيك هي فاات على عالمي خربطتلي حياتي كلا
خربطتلي وراقي
طريقة تفكيري
خربطتلي حياتي
صرت اعرف كيف حب
صرت اعرف كيف الفوضى
الفوضى يصير قانون
صرت اعرف كيف خلي قلبي يدق بكل حب وحرية
صرت اعرف اتنفس
عيش
هيك فاتت
وخربطتلي كل التصاميم وكل المعتقدات اللي كنت عم فكر فيا من انا وصغير
خربطتلي كل مفهوم الحب اللي كنت اقرأه واسمع في
ويخبروني عنه
ورجتني الحب عن قريب
ياريت من زمان فتحت هالشباك
ياريت من زمان خليت هوا الحب يفوت على عالمي ويقلبه
ومن وقتا يمكن صرت فكر وقول
لكل واحد بعد ما فتح هالشباك
صار وقت تخلي الهوا يدخل عالمكن
هوا الحب
تحسوا بطعم الحياة
وتعيشوه بكل لحظة
وتحبو من كل قلبكن
الشباك اللي فتحته
ولكل اللي فتحوا شباكن
انا سكرت الشباك
وخليت الهوا جوا
وكل اللي عم يعيشوا كل لحظة حب
وجنون الحب
ما رح يخلوا هالهوا يروح من عالمن

خلو هوا الحب يرافئكن

بحبكن