المصباح السحري

كتير منسمع عن المصباح السحري الي

بيطلعلك منه الجني السحري الأزرق

وبيقلك شبيك لبيك عبدك بين إديك .

شفنا منو كتير

هاد بالسندباد العربي و علاء الدين

والمصباح السحري وألف ليله وليله

بس الفكرة أنو لو

كنت ماشي بالصحرا وطلعلك

المصباح المغبر و

أنت حكيت المصباح وطلعلك

الجني الأزرق شو ممكن تطلب منه

مصاري - سلطة - جمال وقوة وشباب

أنا عن نفسي محضر ثلاثة أمنيات

بدي أحكين للجني السحري لما شوفه

أول أمنيه هي للناس

كلن وهيه أنو يكون

لكل واحد منا كتالوج

إي كتلوك يعني متل البراد

أو الغسالة أو الدجيتال

يعني لما أنا اتعرف على

شخص جديد قلو مرحبا

أنا أسمي أحمد النابلسي

واتفضل هاد الكتلوك

تبعي وهو من طرفه

يقول مرحبا أنا فلان 

يعطيني الكتالوك تبعو

هلاق شو فيه هاد الكتالوك فيو الصفات

الشخصيه لهاد الإنسان

شو بحب شو بيكره

و شو بيعمل  يعني

وشويه مواصفات فنية

وتعبوية يعني مثلاً

لو فتحتو الكتلوك تبعي

حتلاقو أحمد شاب كتير حباب وظريف 

بس ما بيعرف يتعامل مع الناس

صح لذالك ينصح

بالابتعاد عنه والتغنيلو 

تخيلو معي قديش هاد

الاختراع رائع ولذيذ

هاد بالنسبه للأمنيه الأولى  أما بالنسبه

للأمنيه الثانية راح اتمنى منه أن يكون

مع كل شخص مترجم هيك يعني مثل

شريط الترجمة الي بيطلع بالأفلام الأجنبية 

والهدف من شريط الترجمه هاد مو

الترجمه من لغة للغة أو من الحلبي للشامي

لا رغم أنه ضروري  بس مو هاد قصدي

انا بدي شريط ترجمه

لحتى أفهم هالعالم شو

بدها مني صح وهيه

تفهم شو أنا بدي منها

يعني مثلاً لو كنت قاعد

مع شلة بنات بالجامعه

وقلت أني جوعان البنت الأولى

راح تفهم أنو أنا

نوري ومو شبعان ببيت

أهلي  والثانيه راح

تقول يقطع عمرك شو

غليظ مفكر حالك

راح نركض وراك ونقلك

عزمنى على المطعم

والثالث راح تفهم شي ثالث وتقول

شو قصتو هاد العمى ضربو

بينما أنا قصدي أنو أنا فعلاً جوعان

أو مثلاً لو قلت لوحدة

أنو عطيني إيميلك أو

رقم تلفونك فراح تفهمني

غلط وتقول يقطع

عمرك شو دب

مفكر حالك دون

جوان وعم طبقني يقطع عمرك

بينما أنا بيكون

قصدي فعلاً صداقه بريئة  

أما بالنسبه للناس

الي بدي أفهم عليهون

فاوضح مثال كان الشرطي

الي كان بشعبه

التجند ضل  ساعة عم يحاول

يفهمني أنو بدو مصاري 

وأنا مثل ال %#&*#* ماكنت

أفهم عليه

وكل هاد لانو مامعي مترجم

ليفهمني هالعالم شو بدها

الشغله الثالثة ألي بدي اتمناها

من الجني

هي جهاز قريب للكمبيوتر

بس الو مهمه

خاصة  انو أنا لما يكون

عندي مشكله

بروح لعند هاد الجهاز

وبدخل مشكلتي

وبخلي الجهاز يحلل المشكله ومن بين

مجموعه الحلول إلي قدمتها

بدي ياه يختار

الحل الأنسب ويكون على

ضمانته وكفالتو

وفي حال ما زبط بدي ياه يدفعلي

تعويض مادي ومعنويلس

.هدول هنن الأمنيات

أي ممكن اتمناهم من

الجني السحري 

ياترى أنتو لو

طلعلكم الجني شو

ممكن تطلبو منه

بالنهايه بدي اتشكركم واتمنا لكم

الصحه والعافيه رمضانكم مبارك

وبتمنى اذا يوم من الأيام

طلعلكم الجني

السحري ما تتمنو منه يقصفلي

عمري ويخفيني من الدنيا