للبراغي أنواع عدة نذكر أشهرها، حاول تراجع البراغي اللي أكلتها بحياتك واللي إنتا ضربتها وشوف بتنتمي لأي نوع

1. البرغي الموجّه  ويتكون هذا البرغي من رأس أحادي يكون موجّه إليك مباشرة من عدوّ لك بالشغل متربص فيك ومستنّي الفرصة وإنتا من شطارتك أعطيته الفرصة ففقعك برغي محترم

2. البرغي الجماعي أو – ملتي برغي (Multi Berghee) – وهذا من أقوى البراغي ويكون مفعوله شديداً وبكون مجموعة من الموظفين بدون يضربوا موظف واحد... برغي و لعند المدير فورا... وطبعاً لإنهم جماعة المدير راح يعتبر إنهم صح وإنتا غلط..

 3. برغي متعدد الاتجاه أو – ملتي دايركت برغي (Multi Direct Berghee) – وهذا برغي بتضربو عند مديرك وإنتا قاصد فيه- والنية بالقلب - شخص معين وإنو ما بحافظ على مصلحة الشغل وإنو ضد مبادئ الإدارة وبالجملة بتلطشلك خمس ست موظفين بالمعيّة مش عاجبينك وشايف إنهم ممكن يضرّوك، وهذا يعتبر من أذكى البراغي لإنك ضربت عشر براغي بحجر واحد...

 4. برغي الرحمة وهو برغي نادر تطلقه بحالة تشوف صاحبك تعبان من الشغل ومش عاجبته الشركة والموظفين بيعطوه شغل كتيير فوق طاقته والأخ ممكن من الضغط يروح فيها... فبتروح حضرتك عند المدير وبتلعن سنسفيل أبوه لصاحبك وبتظلّك توزّ عليه حتى يقوم المدير ويقدم فيه عريضة ويكحشو وهيك بتكون إنتا أطلقت عليه رصاصة الرحمة وخليته يقعد بالبيت معزز مكرم...

 5. إن دايركت برغي (Indirect Berghee) وهو من أقل البراغي فاعليّة يصدر من واحد قرفان زهقان عندو مبدأ عليّ وعلى أعدائي وبروح على المدير وبدال صباح الخير بحكيلو: 'إنتا لو بتضبّ موظفينك بدل ما إنك قاعد ورا الكرسي، ولك شوف شو عم بصير…' وبتصير تسلخ  شمال يمين وإنتا مو عارف ليش أو مين بس كل هدفك تفش غُلّك وطبعاً ما تتوقع الشباب حيسيبوك بعدها لإنك نكشت الكل وما إلك صاحب...

 6. ريفيرس برغي (Reverse Berghee)  وهو من أغبى البراغي يصدر من إنسان غبي تافه معوّق طافي رايح يدق صاحبه برغي بلاقي حالو إنه دق بحاله برغي!!! مثلاً بتحكي للمدير: 'ترى خالد طول نهارو بدخّن بالشركة (وطبعاً الدخان بالشركة ممنوع) والمشكلة إنّو دايماً بتسلبط عليّ وبدخن من باكيتي...'

7.برغي طويل المدى وهذا البرغي لا يطلقه إلاّ الخبثاء وهو على دفعات وقليل الجرعة بتضلّك تزت براغي صغيرة ومع الوقت بتتجمع عند مديرك إنو فلان الفلاني عليه مشاكل كثيرة ولازم نأدبو وهيك إنتا بتكون كإنك ما عملت إشي – تراكمات يعني – وهادا برغي مضمون النجاح وقد أثبت فاعليته عند الشباب الطيبة

8. برغي موجّه بالأقمار الصناعيّة وهذا البرغي ما إلو علاج ولا مضاد حيوي لإنه برغي من شخص واصل من فوق فالأفضل تاخد حذرك من هيك أشخاص مشان تضمن حياة سعيدة هانئة بشركتك ومثل ما نحنا شايفين تختلف البراغي بنوعها وتأثيرها، بس من خبرتي إنو راح ييجي يوم أسود عليك تنردلّك كل براغيك ووقتها حتبكي دم على براغيك القديمة ولو سألتني بحكم خبرتي البسيطة بسوريا وبشركاتها شو علاج البراغي  فالعلاج هو الآتي:

عليك  بتناول الكثير من فيتامين الوقاية 'فيتامين واو' (الواسطة) لإنها بتشكل جهاز ردع ضد المتبرغيين

عليك بالإكثار من الحذر والخبث والتحفظ.... ممكن ذلك يخفف فقط ولو إنو البعض يشكّك في ذلك ويقول: وداوِها بالتي هي الداء... يعني برغيلو الصبح قبل ما يبرغيلك المساء

إمشي الحيط الحيط ودايماً إحكي حاضر....ولا تحكي لأ....ومع ذلك برضه حتتبرغن مش بكيفك مكتوب عليك البرغي

        كل يوم صبّح على مديرك وإسألو: معلم شو الأخبار؟ إن شاء الله ما في أولاد حلال حكولك شو حكينا عنك  مبارح؟؟؟

وهاد كلو من خبرة عمل سنتين

لكم مني افضل التمنيات بالتوفيق