بحث
بحث متقدم
Category: استديوهات فوكس

 

استديو فوكس للحقيقة العلمية ®
 
اهداء خاص لأحلى عيون , و اللي كانت وراء مثابرتي على كتابة هالفصل ... الى الحلوة اللي بتعرف حالها ... عراسي والله
 
المبحث الثالث
الفقرة الأولى : الانفجار الكبير .. نشوء الفكرة
 
في سحيق الزمان , و قبل شي كمشة مليونات من السنين , حصل انفجار عظيم .. عظيم يعني كبير كتير ,يعني شغلة عالبغلة , و هالانفجار يا سيدي ما أنت , نتج عنو طاقة عظيمة , و ضلضمينا كبيرة متل ما حكينا بالحلقة الماضية , و على قد ما هالضلضمينا كبيرة , على قد مو العلم الحديث قادر انو يشنكشها و يحيط فيها بما يتضمنه من امكانات جبارة طورها البني آدم
هالانفجار هاد يا عزيزي كان أول مين دل عليه عالم أميركاوي اسمو ادوين هابل ... لاحظ انت أهبل , بس هو هابل ... المهم , كيف اكتشف هالشي ؟
كل جسم بهالكون الكبير لما نسخنو , سواء بالمقلاية التيفال أو بطنجرة الضغط أو انشالله بشي فرن عالي لصهر الحديد ... بيصدر عنه ضوء مميز , يعني خاص فيه , يعني اذا جبناك و لحشناك بشي قدرة فول و سخناك , و حطينا رفيقك بقدرة الفول اللي ناحك و سخناه كمان , فالأمواج الضوئية الناتجة عنك رح تكون أكيد مختلفة عن الأمواج الناتجة عنو , رغم انو أهبل متلك ... بس هيك ربك بده
هلق هالأمواج الضوئية هي فينا نحللها بشي اسمو الموشور , لا تقلي مو مارر عراسك ... هاد عطوك ياه بصف العاشر ريتك تنعطى لطشة ... المهم لما منحلل هالأمواج الضوئية هي رح ينتج عنها ألوان الطيف , بس متل ما قلنا رح يختلف انزياح هالألوان على سلم الطيف من طبل لتاني , لأنو متل ما حكينا الضو الصادر عنك مو متل الضو الصادر عنو ريتكن تقبرو بعض بهالأضوية
هلق حللنا الضو بالموشور , و هون رح قلك معلومة ظريفة بعمر حياتك مو سمعان فيها انا ببصملك بالعشرين , المعلومة يا سيدي انو اذا كنت انت عم تبعد عن الموشور و انت محطوط بقدرة الفول و عم تضوي , الوان الطيف اللي اتحللت من الضو الصادر عنك بتكون منزاحة نحو الطرف الأحمر من الطيف ... حلو ؟ .. حلو
و بنفس الوقت اذا كنت عم تقرب من الموشور , فالألوان رح تنزاح للون البنفسجي ... كمان حلو
هلق اطلاع انت و ياه من قدرة الفول و خلينا نرجع للنجوم و للعالم هابل ... العالم هابل لما حلل الضوء الصادر عن النجوم بالموشور , اكتشف أنو ألوان الطيف تبع هالنجوم هي عم تنزاح نحو الطرف الأحمر , شو معناها يا شاطر ؟ معناها انو هالأجرام السماوية هي عم تبتعد عنا و عن بعضها ... .و معناها انو الكون يتسع
طبعا أول ما حكي صاحبنا هابل بهالموضوع , العالم اتمسخرت عليه , انو ليكو هاد شو بدو , ترك التفاحة مال الزبداني  و راكدلي ورا العلم و لغة العقل و الحكي الفاضي ... بس بالمقابل  ما في داعي قول قديش هالعالم فيما بعد حست حالها تافهة و صغيرة لما أثبت العلم الحديث أنو هالحكي مزبوط , بل و جدير بالانحناء أمام منطقيتو , هلق طبعا اللي حابب يضل بالتفاحة يضل , و اذا بيحب فيه ينتقل للموزة كمان .... بس لازم يعرف انو العالم من زمان تركت التفاح بمكانو الطبيعي بالمطبخ , و انتقلت لمرحلة تشغيل المخ .
وهاكزا كان هاد الدليل الأول اللي بيأكد أنو الكون يتسع , و أنو بالأساس هالاتساع هاد ناتج عن الانفجار اللي بيقولو عنو الكبير .... و بالتالي يا ابني هالكون الكبير اللي حواليك مو نايم و مسطل متل ما انت مفكر , لا وحيات شواربك , هالكون عم يكبر و يتسع و يمشي .... و انت مكانك راوح .
 
يتبع

 

Delicious Digg Facebook Fark MySpace