نزع فتيل أزمة المنونات

كارلوس أبو ناموسة : ما حصل كان معجزة

حي الصناعة – وكالات :

تمكن المبعوث الالكتروني كارلوس أبوناموسة في ساعة مبكرة من صباح يوم أمس من نزع فتيل أزمة المنونات الشهيرة التي كادت تشعل صدامات داخلية في موقع برابرو بدأت نذره بتراشق بالتعليقات ما لبثت أن تطورت الى مصادمات مباشرة بين الأطراف المتنازعة على خلفية خلافات حدودية سابقة .

و كان المبعوث أبو ناموسة قد بحث مع مختلف أطراف النزاع في ساعة متأخرة من مساء أول أمس اللأحد السبل الكفيلة بحل الأزمة و أجرى محادثات مكوكية و مكالمات متعددة قبل أن يتوصل الأطراف الى موافقة مبدأية للتهدأة و الحوار , و من ثم الاجتماع في اليوم التالي حيث جرى اجتماع مغلق مطول قبل أن يتم التوقيع على اتفاقية صلح الصنيعية الذي يعد امتدادا لاتفاقية العامود و اتفاقية المجد .

وقد تخلل الاجتماع الكثير من الاشارات الايجابية التي أشاعت جوا من التفاؤل بحل نهائي للمشكلة , فقد تبادل أطراف النزاع السجائر لأول مرة منذ تشرين ثاني نوفمبر في العام الماضي , كما عبر أحدهم عن تفاؤله بالقول : مرحلة ظريفة هاي . و بدوره أكد مصدر مسؤول في اللمة عن رغبته بمسح دمعة الماضي و تجاوزها نهائيا , بينما أكدت مصادر مطلعة لفوكس نيوز أن زمن الكنسلة لم ينتهي بعد و أن خيار الكنسلة قائم حتى اللحظة بانتظار ما ستبديه الأيام القادمة من تطورات . 

كارلوس أبو ناموسة ( يسار ) لحظة التوقيع على الاتفاق

يحتجب فوكس عن الصدور أو المشاركة في الموقع لأسباب فنية و لمدة محددة و يعاود الصدور في وقت يعلن عنه لاحقا.

...نسخة الى وزارة الشؤون الاجتماعية والعمل .

... نسخة الى الديوان ..

..نسخة الى الارشيف.

...نسخة للنشر في الجرائد الرسمية

استديو فوكس للحقيقة العلمية ®

استديو تعليمي هادف  يسعى الى دحش الفكرة العلمية بأمخاخ الاخوة المشاهدين بشكل مبسط و قريب لاستيعاب الشبيبة الطيبة

المبحث الأول ... الاهداء

الى  كل الشبيبة ... الشبيبة الطيبة , الى  اسعاف  نيوتن .. صلاح أفلاطون .. عزيز عبدو المنفلوطي .. اب جاسم شعراتو ( الملقب انشطاين ) .. كامل ماركس صاحب نظرية رقص المال , و كل من تسول له نفسو أن يبحث عن الحقيقة العلمية بعيدا عن الأوهام  و الخرافات و العادات و التقاليد و الرز بفول ............

كما نتوجه بالشكر الجزير لادارة موقع تراترو على اتاحة المجال لهزا الاستديو كي يرى النور دون الاضطرار الى سرقة خط كهربا من عامود البلدية

المبحث التاني ....

 الفقرة الأولى  .... مقدمة

كسيرا ما يتسائل البعض ( بمعنى يستفسرو , مو يتغالظو ) كسيرا ما يتسائل البعض عن حقيقة الكون , و أصل النشوء , و البداية و النهاية  و الى ما هنالك من اسئلة يمكن ان تخطر على البال خصوصا بعد وجبة فول بلبن أو تسئية بسمنة أو كوسا محشي , يعني اتخيل حالك عزيزي المشاهد قالب على ضهرك و كرشك قدامك مترين و قاعد عم تتأمل بهالملكوت .... ايوا , هيك بالزبط بتكون دخلت بالحالة  ,  و نحنا .. حرصا على وقتك السمين اللي منعرف أكتر منك انو مانك فاضي فيه للتفكير و تشغيل المخ ان وجد , قررنا انو نساعدك و نوصلك النزر اليسير اللي منعرفو من الحقيقة العلمية مشان نوفر عليك التفكير غير الضروري ... عراسي والله  .

الفقرة التانية ..... نشوء الكون

قد يقول قاقل .... اي شو جاية عم تحكي انت , شو نشوء الكون و بطيخ مبسمر , هاد كلو حكي فاضي و اكل هوا , الكون نشأ من ورا التفاحة , ايوا , خير انشالله .. أنو تفاحة هي بلا صغرة ؟ قال التفاحة اللي أكلها آدم و نزل بسببها عالأرض ..... هون بترتسم على وجه هالقائل هاد ابتسامة  ملؤها البلاهة .... و خلص أخونا بكلمتين حل معضلة نشوء الكون و روحو كبو كلشي في بين ايديكم علم و نطريات  طلعت عيون البشرية بالطور و بالعرض لوصلتلها , و بسببها ناس اتخوزقت و ناس انحرقت  .

لك يا طبل بعيد من هون ......... عليي الطربوش مخك اذا ورم بيضلو أصغر من التفاحة اللي عم تحكي عنها

قال طيب شو الحقيقة لكان ؟ قلنالو ليك عمو

بالعلم ما في شي مطلق ... في نظريات تمت البرهنة عليها و تعتبر حتى اشعار آخر مبرهنات يستند عليها لحل الكثير من المعضلات العلمية ... بس بالوقت الراهن , و ضمن نطاق العلم الحالي , تعتبر حقائق ....خود مسلا يا ابني فيزياء الكم  ( مو الكم  تبع قميصك يا ترين ) الكم يعني  المستمد من النظرية الكمومية أو نظرية الكوانتوم  ... و ما يماثلها من فيزياء كلاسيكية مبنية على نظريات صاحبك اسعاف نيوتن .... هلق كل هالفيزياء و هالنظريات الكلاسيكية كانت شغالة و عين الله عليها حتى بدايات القرن ( اللي ريتو ينطحك ) العشرين  ... لما اجا اب جاسم شعراتو ( الملقب اينشطاين )  و طلع للبشرية بالنظرية النسبية  و بأنو يا ابني يا مشاهد ما في قوانين ثابتة بالمطلق لأنو هالقوانين اللي عم تخضع لجمل عطالة معينة بتختلف باختلاف الواقع الفيزيائي المحيط فيها , يعني كلشي نسبي .... و طلعلنا بعدين بقانون آينشطاين للطاقة ( حيس تساوي الطاقة  جداء الكتلة بمربع السرعة ) و فتحلنا آفاق جديدة للعلم صارت فيها فكرة التنقل عبر الزمن فكرة ممكنة نظريا بس صعبة التطبيق عمليا .... بس انو ممكنة ... و لك يحرئ حريشك ... اتخيل حالك يا طبل و انت عم ترجع لورا بالزمن لوقت ما كنت دربكة صغيرة .... مو شغلة بتحط العقل بالطنجرة  ؟ اي  والله

طيب , و من هالنظريات العلمية اللي بتساعدنا بفهم نشوء الكون عندك نظرية  الانفجار الكبير أو البيج بانج .... قال طيب قديشو كبير هالانفجار عمو ؟ قلنالو عما الدبب ... هالانفجار كبير كتير, قد ما تقول و أكبر .... انفجار عظيم نتجت عنو قصص و ضلضمينات و حشكلوز باللوز شي بتعرفو يا ابني و شي لسا ما سمعت ولا بتسمع بحيات عمرك فيه ..و نتيجة هالنظرية  حسننا نعرف انو الكون يتمدد و يتسع  في كل اتجاه و بمعرفة سرعة تمدد الكون صار فينا يا ابني يا حباب انو نتوقع  قديش عمر الكون , طبعا لا تعزب حالك بالحساب انت خمسة بخمسة ما بتعرف تحسبها , رح نعطيك النتيجة فورا , قال يا ابني الكون عمرو التقريبي 14 مليار سنة ... اف شي كتير رقم كبير ما هيك ..اي  نعم كبير .. العين تطرئك .. قال طيب عمو اشرحلي أكتر عن هالنظرية , قلنالو تكرم العين تبع الانت عمو , رح نشرحلك هالنظرية بالحلقة القادمة .

ملحوظة .... نحنا هون عم نحكي علم ... اذا كان هالعلم اللي البشرية أفنت حالها لوصلتلو مو عاجبك أو ما بيتوافق مع معتقداتك العظيمة و عواطفك الجياشة , فيك ما تتعلم , و بامكانك تفتح بسطة يانصيب أو عرباية ترموس تسترزق منها و اتروك النظريات و التفكير للعالم اللي بدها تتطور ......

يتبع

مجزرة إسرائيلية في أسطول الحرية      

نقلا عن موقع الجزيرة