Search:
Advanced Search
Posted: 10/3/2015 - 4 comment(s) [ Comment ] - 0 trackback(s) [ Trackback ] - 0 Votes
Category: حياة
 نعم ...لأنها أمي
نعم .. لأنها أنجبت إخوتي
فيهم الطويل و القصير
فيهم الخجول و الجريئ
فيهم الحنون و القاسي
فيهم المسؤول و المستهتر
فيهم التقي و الفاجر
فيهم العفيف و المختلس

نعم ... لكنهم جميعاً إخوتي و أفتخر بهم و أحتاجهم و أنتمي إليهم 


أحبك سوريا

Posted: 7/11/2012 - 3 comment(s) [ Comment ] - 0 trackback(s) [ Trackback ] - 1 Votes
Category: حياة
 سلامي إلى كل أهلي في تراترو و لا أعرف إن كنت سأجد من أهلي القدامى أحد فقد مضى عامان على آخر تواجد لي ظروف صعبة مررنا بها جميعاً جعلت منا أسرى همومنا و مشاكلنا و مصيبتنا الكبرى في وطننا و شعبنا و أهلنا الذين يقتلون و العالم فرح يتفرج و يشاهد السوري يقتل السوري فكيف لا أغيب
Posted: 8/11/2010 - 15 comment(s) [ Comment ] - 0 trackback(s) [ Trackback ] - 0 Votes
Category: حياة

بسم الله الرحمن الرحيم

مرحبا يا أهلي بتراترو مشتاقلكم كتتير

 

هلأ الموضوع إني بعد حادث صغير أدى لكسر برجلي ،مو المشكلة طبعا بالكسر المشكلة إنو بأعلى رجلي

 

إضطر الدكتور يجبرلي التنتين و هيك يا أصحاب الجلالة قعدت بالبيت بمعنى تاني بركت أو انشليت

 

لك ولييييييييييي  أنا أقعد بالبيت  ... يا لطيف ...  و هلأ ...  بهالفترة  .... بهالمرحلة الحساسة

 

و أديش الوقت 25 يوم لحتى 40 على حسب حاجة التجبير

 

هلأ أول كام يوم ما بعرف حالي  كرهان خيالي

 

عم خانق دبان وشي متل ما بيقولوا

 

ممنوع إني إقعد لازم ضل مستلقي هيك الدكتور الفهمان وصاني

 

معلوم شو فارقة معه مو هو اللي رح يقعد

 

بالأيام التانية إكتشفت عدة شغلات

 

نعمة الكمبيوتر و ا لإنترنت يالله شو نعمة

 

نعمة إنك تكون شب بمجتمعنا تطلع و تفوت على كيفك

 

حسيت بحالة البنت المحبوسة بالبيت مشان أخ أو أب أو زوج غبي لا بيرحمها و لا بيخلي رحمة الله تنزل عليها لا بيطالعها و لا بيخليها تطلع مع غيره

 

نعمة الرجلين نعمة المشي

نعمة النوم على جنبك

لك نعمة حك رجلك ... الحك ... هادا قضية لحاله ... تقولو جربت

نعمة الدوش يا الله

نعمة السباحة

لك يا جماعة ....  نعمة إنك تقعد .... أديه بسيطة

و شغلات كتير الله لا يدوقكم إنكم تخسروها

 

بلحظتها قلت يا ريت تكون كل مشاكل الشغل مع بعضها عندي و قوم

 

مالكم بالطويل استغليت باقي الأيام بالقراية و الحمد لله قرأت كتير

 

و حسيت أديه كنت ناسي الكتاب ..... خير جليس

في عندي كتب شاريها من عشر سنين ما قرأتها لهلأ

 

قلت لحالي لو إنو الأفكار اللي تعلمتها من هالكتب تعلمتها لما اشتريت الكتب شو كان صار

 

و الحمد لله تحسنت و صرت بعدين عال العال و اكتشفت إنه حتى هالحادث كان خير إلي

 

الخيرة  فيما اختاره الله

 

شكراً كتير لمروركم سلفاً

 

أخوكم

بشار الدمشقي

Posted: 26/9/2010 - 17 comment(s) [ Comment ] - 0 trackback(s) [ Trackback ] - 0 Votes
Category: حياة

بعتذر من كل حبايبي بتراترو الغالي

 

آسف كتير على غيابي غير المتعمد و اللي كان بسبب حادث صغير

 

اشتقت للجميع و رجعتنا قريبة

 

خلونا بالبال

 

 

أخوكم بشار الدمشقي

Posted: 6/8/2010 - 12 comment(s) [ Comment ] - 0 trackback(s) [ Trackback ] - 3 Votes
Category: حياة

بسم الله الرحمن الرحيم

أول شي خلوني قول إني بحبكم جميعاً و ما شاء الله غبت شوي و رجعت لاقيت إبداعات تعبت لحتى قدرت مر على بعضها بس

 

هلأ هيك خطر ببالي شغلة

 

ليه ما بتكون كمبيوتر؟

  

مو إنت يا إنسان إخترعته أساساً

 

//////////////////////

 

خلي نغمة إقلاعك لما بتصحى حلوة و رايقة و خاصة فيك

 

------------

 

خلي سطح المكتب تبعك أو الواجهة بخلفية رائعة مو سودة

 

--------------

 

شو رأيك تنسق محتويات جهاز الكميوتر فيك و ترتبها على حسب المجال يعني لما

تدخل على مجلد البيت شو رأيك تسكر مجلد العمل و لما تروح مشوار حلو شو رأيك

تعمل إغلاق لكل شي مفتوح

 

--------------

 

لما بترتكب أي خطأ مع أي حدا ببساطة عميل 

 

Ctrl + Z

 

و اعتذر لا تخاف تعتذر

 

----------------- 

شو رأيك تعمل تنصيب لبرنامج مضاد فايروسات متل الحب و الإيمان و الحكمة لحتى ما

يقدر أي فيروس إنو يخرب عليك حياتك

 

---------------

 

شو رأيك تحط جدار حماية من خلال الصراحة و الصدق مع كل اللي حواليك

مشان ما يقدر أي هكر إنو يخترقك و يتلاعب بحياتك

 

----------

شو رأيك تعمل داونلود لبرنامج محادثة تقدر من خلاله تتواصل مع الناس

و يكون هالبرنامج مليان إبتسامات لحتى تكون مميز بين صحابك

 

----------

 

شو رأيك تستعمل زر

F1

و تطلب المساعدة من اللي صنعك  كل ما صعب عليك شي

 

--------

شو رأيك تسعتمل

Shift+Delete

لحتى تحذف أي شي ممكن يسيئ لحياتك حتى لو كان ملف

مهم بمرحلة ما تخلص منه  بما إنو ما خانك حذف نهائي

 

----------

 

أكيد حذفت ناس كتير من حياتك بنصحك تستعمل برامج

إستعادة الملفات اللمحذوفة و ترجع الناس اللي تركتهم بظروف معينة

و لساك بحاجتهم

 

--------

 

دائماً خلي ضمن قوائمك إضافة ملف جديد و خليك قادر على إستيعاب

ملفات إضافية لأنو الأصدقاء أكبر كنز ممكن تللاقيه

 

---------

مساحة التخزين عندك كبيرة الهارد ديسك

ليه تخليه فاضي

كل يوم تعلم شي جديد

------------

هلأ إذا كتير تعرضت لضغوط بحياتك ببساطة بقلك

عميل ريستارت و بترجع بتتنشط من أول و جديد  و لا تخلي حالك معلق كتير

 

------------

كمان عن  جديد خلي نغمة إغلاقك حلوة متلك مشان اللي قدامك يستنى

بفارغ الصبر إقلاعك

 

////////////////////

 

يمكن كترت عليكم بس شغلة خطرت ببالي شاركتها مع حبايبي

 

 

 

أخوكم

بشار الدمشقي

 

 

 

 

Posted: 4/8/2010 - 8 comment(s) [ Comment ] - 0 trackback(s) [ Trackback ] - 6 Votes
Category: حياة

بسم الله الرحمن الرحيم

 

أول شي كل عام و انتو بخير و يا رب تكونوا كلكم بخير و سعادة

 

هلأ لو سألتك شو يعني إنك عربي  سوري

 

1: إنت من بلد عربي و البلاد العربية كانت و رح ترجع أم الحضارة

 

2: إنت من بلد فيها كل أحوال الطقس يعني ممكن تتمتع بجمال التلج و بروعة ليالي الصحراء

 

3: إنت من بلد ممكن تشوف فيها كل أنواع البشر من كرم البدوي لحضارة المدني

 

4: إنت من بلد متنوع التضاريس يعني بتحب الجبل بتلاقيه و بحب البحر بتتمتع فيه

 

5 : إنت من بلد شعبه كريم و إنساني  يعني بتروح أي مكان ما بتخاف لا من قطاع طريق و لا من أزعر

 

6 : إنت من بلد تنوعت فيه الحضارات و الأديان فبالتالي تنوعت  ثقافتك

 

7 : إنت من بلد بيسمح لأي عربي بالدخول بدون فيزا أو تأشيرة يعني رح تقدر تشوف كل إخوانك العرب

 

8 : إنت من بلد ممكن نسميه جمهورية الحب العربية لشدة إنتشار هالكلمة فيه

 

9: إنت من بلد ما بتعطش فيه

 

10 : إنت من بلد ما في أحلى من بناتها و لا أرجل من شبابها

 

و الله صعب نحصي محاسن سوريا

 

بحبك يا سوريا

 

 

أخوكم

بشار الدمشقي

Posted: 16/7/2010 - 9 comment(s) [ Comment ] - 0 trackback(s) [ Trackback ] - 1 Votes
Category: حياة

لا أظن أنني برسالتي هذه سأفيدكم علماً أو أدباً أو سأخبركم خبراً

و لكنني أحببت أن أخبركم أن غيابي بداعي السفر

و أنا في عمل سينتهي بعد عشرة أيام في المملكة العربية السعودية

و أحببت أن أشكر كل الذين لاحظوا غيابي 

و على وجه الخصوص الأخت الغالية

Hala Hala

تحياتي إلى الجميع و أعتذر على غيابي

 

أحبكم جميعاً

أخوكم

بشار الدمشقي

Posted: 2/7/2010 - 9 comment(s) [ Comment ] - 0 trackback(s) [ Trackback ] - 3 Votes
Category: حياة

 

أمثال شعبية
هلأ أول  شي لا تواخذوني لأني كتبت الأمثال متل ما سمعتها من الختايرية و الناس اللي شفتهم و عرفتهم بغض النظر عن قناعتي
أنا بأي متل من هالأمتال و لا تواخذوني إذا الموضوع طويل بس بتقدر توقف إيمت ما بدك ،  حبيت حط كل
 الأمتال اللي بعرفها متل المرجع يعني
و طبعا هذا مو كل شي هاد اللي قدرت إجمعه إتحفونا إنتو بقى
 
خلونا نبدا
 
 
 
1-               شو ما طبخت العفشى جوزها بيتعشى
2-               تي تي تي تي متل ما رحت جيتي
3-               كرمال عين يكرم مرج عيون
4-               ياللي بيشوفني بعين بشوفو بتنتين
5-               الجمل لو شاف حردبته وقع و انكسرت رقبته
6-                مو كل مين صف صواني صار حلواني
7-                لايق للشوحة مرجوحة و لأبو بريص بقاب
8-                صار للدبانة دكانة و صارت تسكر تمانة
9-                 نحنا طيور حرة ما ننصاد بالمرة مين حاول يحبنا مرة منحبه ألف مرة و مرة
10-           البسمار المدقوق ملزوق
11-           قاله مين أدرى فيك قال: ربي ثم جاري
12-           يا ما تحت السواهي دواهي
13-           قاله يا جاري إنت بحالك و انا بحالي
14-           ألف عين تبكي و لا عين أمي تدمع
15-           اللي ما فيه خير لأهله ما فيه خير للغريب
16-           قالوا للحرامي حليف قال إجانا الفرج
17-           سآل مجرب و لا تسأل حكيم
18-           إذا كبر إبنك خاويه
19-           إذا دهرك فرس كون خياله
20-           الولد إذا بر تلتينه لخاله
21-           طب القدرة على تمها بتطلع البنت لأمها
22-           القرد بعين أمه غزال
23-           المنحوس منحوس لو علقوا براسه فانوس
24-           عقل ميت مرة بعقل جاجة خوتة
25-            ذنب الكلب أعوج و لو حطوه بالقالب ميت سنة
26-            أعزب دهر و لا أرمل شهر
27-          الإيد اللي بتنمدلك بوسها و إدعي عليها بالكسر
28-          الحارة ديقة و الحمار رفاس
29-          يا رايح بلا عزيمة ما لك قدر و لا قيمة
30-         إذا أبوك البصلة و أمك التومة من وين بدها تكون ريحتك منظومة
31-         اتجوزنا لننستر اس الله أيام الفضيحة
32-         قاله الحمار ضرط نار قاله سماع و سطح
33-         أهل العريس بطنة و رنة و أهل العروس ما عندن خبر
34-         كل قمحة مسوسة و إلها كيال أعمى
35-         العضة محبة و لو كانت من سنان كلبة
36-         خود من الزرايب و لا تاخد من القرايب
37-         إصبعتي مني و لو انقطعت و عيني مني و لو انقلعت
38-          ضربني و بكى سبقني و اشتكى
39-         المال بيجيب مال و القمل بيجيب صيبان
40-          لا تستنى المصايب إلا من القرايب
41-          قريبك لا تقربوا بيلدغك عقربوا
42-          يا مصفاية ما يعيبك بخش
43-          إذا صاحبك عسل لا تلحسوا كله
44-         الباب اللي بيجيك منه ريح سده و استريح
45-         عصفور بالإيد أحسن من عشرة عالشجرة
46-         اللي بيستحي من بنت عمه ما بيجيب ولاد
47-         العنكبوتة شافت بنتها عالحيط قالت تسلميلي متل اللولية بالخيط
48-         التوم طعمته منيحة بس ريحته فضيحة
49-         إنت اللي بتذوق الثوم بس الناس اللي بتشمه
50-          يا مآمنة بالرجال مآمنة بمي جوا غربال
51-          ياللي متلنا تعو لعنا
52-         جيناك يا عبد المعين لتعين طلعت يا عبد المعين تنعان
53-         كل عنزة معلقة من كرعوبها
54-         كل جاجة حفرت على راسها عفرت
55-         يا غافل إلك الله
56-         جاك الموت يا تارك الصلاة
57-         يا مستعجل وقف لألك
58-         كل شي بحسابه و العدس بترابه
59-         اللي بيعرف بيعرف و اللي ما بيعرف بيقول كف عدس
60-          بعد عن الشر و غنيله
61-          قاعد بحضنا و عم ينتف بدقنا
62-         اللي إيدو بالمي مو متل اللي إيدو بالنار
63-         اللي عم ياكل العصي مو متل اللي عما يعدها
64-         كل مين بياخد أمي بقلو عمي
65-         بدك تاكل عنب و الا تقاتل الناطور
66-         ان نجيت من السفر عطي أهلك لو حجر
67-         ابن الحلال عند ذكره بيبان
68-         انا أمير و انت أمير مين بيسوق الحمير
69-         اللي ما بيخاف من الله خاف منه
70-          الأب عاشق و الأم غيرانه و بنتهم بالبيت حيرانه
71-          ابن الإبن إبن الحبيب وإبن البنت إبن الغريب
72-          إذا صفيت النيه اللقمة بتكفي مية
73-          ضروب كلبك بيتربى إبنك
74-          اتفق القط و الفار على خراب الديار
75-          البير اللي بتشرب منه لا ترمي فيه حجر
76-          برغوت قال للبقة يضرب الشرشوح إذا ترقى
77-          البرطيل بيحل دكة القاضي
78-           بيضة اليوم و لا جاجة بكرة
79-           بات مغلوب و لا تبات غالب
80-           بدال خطوطك و الحمرة غسلي وشك يا سمرة
81-           بعد الكبرة جبة حمرة
82-           بعد سنة و شهرين جابت صبي بلا عنين
83-           بده يعرف القار و القرقير و البيضة كيف بتصير
84-           البنت يا جازتها يا جنازتها
85-           بالوش مراية و بالقفا صرماية
86-            بارك الله في من زار و خفف
87-            بحصة تسند جرة
88-            الحكي إلك يا كنة اسمعي يا جارة
89-            البيت اللي ربه مرة كل ماله لورا
90-            بدل اللحمة و البيتنجان هتلك قميص يا عريان
91-            بتقول تور بيقول احلبه
92-            تجوزوا الفقرا كترو الشحادين
93-            تمي أقرب لي من أمي
94-            تغيير الهوا أحسن دوا
95-            تلاتة ما بنتطاق الطق و البق و النق
96-            التعلب شاف العنب عالي قال قلبي من الحامض لاوي
97-            توب العيرة ما بيدفي و إن دفى ما بيدوم
98-            جبنا الأقرع ليونسنا كشف عن قرعته و خوفنا
99-            تلاتة ما بيتخبوا الحب و الحَبَل و ركوب الجمل
100-                      توب الكسلانة مفعوس لا منطوي و لا ملبوس
101-                      الجنة بلا ناس ما بتنداس
102-                      جوع كلبك بيلحقك
103-                      جعجعه بلا طحن
104-                      الجود بالموجود
105-                      الجاجة ما بتبطل كارا لو قصوا لها منقارا
106-                      جوزت بتني لأخلص من بلاها رجعت و جابتلي معاها
107-                      الجنزير و الطوق و لا قعدة مع قليل زوق
108-                      جدي لعب بعقل تيس
109-                      الجاهل لا تطيعه و العاقل لا تبيعه
110-                      الجمل بليرة و ليرة مافي
111-                      حمارتي العرجة و لا فرس أبن عمي
112-                      الحيط الواطي بيعلم الحرامي السرقة
113-                      الحية ما بيبرد دمها لتنفض سمها
114-                      حمار انعزم على عرس يا يزق مي يا يحمل حطب
115-                      حساب بالحقلة و لا قتال عالبيدر
116-                      حبله و مرضعه و شايلة أربعة و طالعة عالجبل تجيب دوا الحبل
117-                      الحجر اللي ما بيعجبك بيفجك
118-                      حضر المعلف قبل ما يجيب الفرس
119-                      حبني و خدلك جمل قلو اذا كانت معدتي ما تهضمك شو العمل
120-                      حشري نزل على جهنم قال الحطب نديان قالوا له احترق و سكوت
121-                      خطبوها تعززت تركوها تندمت
122-                      خذوا البنات من صدور العمات
123-                      الخصلة اللي بالبدن ما يغيرها غير الكفن
124-                      خبز الرجال عالرجال دين و عالأندال صدقة
125-                      خل ببلاش و لا عسل بمصاري
126-                      خمسة ستة بخدمتها و هي ما بتشرق مخطتها
127-                      خمي و باتي و لا تاكلك حماتي
128-                      دردبيس ما بيعرف الجمعة من الخميس
129-                      دبور هدا على مسن قاله سن اذا فيك تسن
130-                      الدارس غلب الفارس
131-                      فوتت الحمام مو متل طلوعه
132-                      دخل عصه بشي ما بيخصه
133-                      يا داخل بين البصلة و قشرتها ما نابك غير ريحتها
134-                      الدفا عفا و لو بنص الصيف
135-                      رزق الهبل عالمجانين
136-                      ربيته جرو صار كلب و عضني
137-                      رجعت حليمة لعادتها القديمة
138-                      كمل النقر بالزعرور
139-                      أكبر منك بيوم أعرف منك بسنة
140-                      قنطارالنار ما بتحرق ايد إلا كاويها
141-                      المونة بدا ركونة ما بدا مرا مجنونة
142-                      أكل ومرعى وقلة صنعة
143-                      السكافي حافي والحايك عريان
144-                      اللي فيه مسلة بتنغزو
145-                      ألف قلبة ولا غلبة
146-                      العين ما بتعلاعالحاجب
147-                      الدم مابيصير مي
148-                      الديك الفصيح من البيضة بيصيح
149-                      ايلول دنبو مبلول
150-                      الحكي صابون القلوب
151-                      الرحمة مخصصة والبلا بيعم
152-                      ألف قولة جبان ولا قولة الله يرحمه
153-                      الموت مع الناس رحمة
154-                      الحية إذا جاعت بتعض بطنها
155-                      الصاحب ساحب
156-                      الجنازة حامية والميت كلب
157-                      الأعور بين العميان ملك
158-                      بدك تعمل جمال علي باب دارك
159-                      تاجرنا بالكفان بطل حدا يموت
160-                      حرد الدب عن الكرم زاد العنب قنطار
161-                      احترنا يا قرعة من وين بدنا نمشطك
162-                      شو بدّي اتذكر منك يا سفرجلة ، كلّ عضّة بغصّة
163-                      أدن من طين وادن من عجين
164-                      السكافي حافي والحايك عريان
165-                      العين ما بتعلا عالحاجب
166-                      الطبل بحرستا والزمر بمنين
167-                      الديك الفصيح من البيضة بيصيح
168-                      إن داقت عليك المخازن مخزنك عبك
169-                      البخشيش بالدرهم والعطا بالقنطار
170-                      الطرق ولو دارت والبنت ولو بارت
171-                      الولد ولد ولو صار قاضي بلد
172-                      بين النَوَر مافي تكليف
173-                      دخان يعمي ولا برد يضني
174-                      دود الخل منو وفيه
175-                    رضينا بالبين والبين ما رضي فينا
176-                      سموك مسحر خلص رمضان
177-                      ضروب الحديد هو وحامي
178-                    عم تتباها بضفاير بنت خالتها
179-                      طلعنا من تحت الدلف لتحت المزراب
180-                       طحان ما بيغبر على كلاس
181-                      على حظ الحزينة سكرت المدينة
182-                      عود منيح واحكي صحيح
183-                      قبل ما تقلا كش اضربها وكسير رجلها
184-                      قللو ما متنا بس شفنا مين مات قبلنا
185-                      كل مين شافني أرملة شمر ورجع هرولة
186-                      كسرنا الدف و بطلنا الغني
187-                    اللي ما بتزينو عروقو ما بتزينو خروقو
188-                      لا تتقل على امك وأبوك بيكرهوك
189-                      لا قيني ولا تطعميني
190-                      كل ديك على مزبلته صياح
191-                      لباس ماله و دكته بأربعين
192-                      لا تقول للمغني غني و لا للرقاص رقوص
193-                      ما بين السابق و المسبوق دقة خازوق
194-                      ما بيحك جلدك غير ظفرك
195-                      متل الحبلاس كل ما كبرت بتحلا
196-                      ما بيعجبوا العجب و لا صيام رجب
197-                      مشتراة العبد و لا تربايته
198-                      اللي خلف ما مات
199-                      لبس العود بيجود
200-                      مو كل مين قال بكره العيد دفعوله
201-                      مجنون يحكي وعاقل يسمع
202-                    من طول عمرك يا تينة مجعلكة
203-                      وقت بتقع البقرة بيكترو سكاكينا
204-                    يا رايح كتر منايح
205-                      يا مسترخص اللحم عند المرقة بتندم
206-                      يلي بيتجوز بالدين بيجوا ولادو بالفايض
207-                    يلي مالو كبير مالو تدبير
208-                      الفرس من خيالها و المرة من رجالها
209-                      عميه تمشط مجنونة
210-                      اللي ما بيعرف النسر بيشويه
211-                      البخش أكبر من الرقعة
212-                      ربوط الحمار مطرح ما بقلك صاحبو
213-                    ساقية جارية ولا نهر مقطوع
214-                      ست وجاريتين على قلي بيضتين
215-                    عيش يا كديش لينبت الحشيش
216-                      عرق آس ولا شماتة الناس
217-                      طعمي التم بتستحي العين
218-                    لبس المكنسة بتطلع ست النسي
219-                      متل حية التبن بتقرص وبتخبي راسا
220-                      يا لبنية بلا كبب يا عداوة بلا سبب
221-                      يلي مالو عتيق مالو جديد
222-                      اللي بيدق الباب بيسمع الجواب
223-                      يللي إلو طباخ ما بزفرايدي
224-                      يلي بيفوتك حصرم بتاكله عنب
225-                        لما كبر وشاب بعتوه عالكتاب
أخوكم
بشار الدمشقي
Posted: 10/6/2010 - 11 comment(s) [ Comment ] - 0 trackback(s) [ Trackback ] - 6 Votes
Category: حياة

المقالة كتبتها على شكل حوار و لكل شخصية لون

 

إبليس : ما شاء الله عليك يا شبلوط ، ما شاء الله عليك شو ذكي

 

شبلوط مرتعشا ً : و الله يا سيدي

 

خربوط مقاطعاً : مو بس هيك يا سيدي

 

إبليس مندهشاً : ليش شو ضل أكتر من هيك

 

خربوط : يا سيدي في ناس إتزوجت و في ناس تآخت و في و في يييييي شو بدي إحكيلك لك خيو

 

إبليس متهكما ً : كمان قلبت حلبي ولك خربوط .... لك الله يخرب بيتك و بيتو  ، لسه في شي

إبليس يمسك قبة قميص شبلوط المرتعش : شوف ولاااا ..  لسه الله ما خلقه اللي بدو يخرب علي شغلي ، هنن

كلمتين ، بدو يرجع كل شي متل ما كان

 
                  

خربوط : مظبوط يا سيدي

 

إبليس :خراس إنت التاني ولا ، لك لعمى بيقلبو .... و كأنه لسه في بالدنيا خير

إبليس مردفاً : لك يا حمار ، يا حمار ، لما اخترعنا شي اسمه مواقع اجتماعية متل هالتراترو اللي حضرتك  ما

عرفت تضبط أعضاءه

كان القصد نعلق الشب بالشب و نربط الشب بالبنت  يكذبوا و يأذوا بعضهم ، مو يتآخوا و يحبوا بعضهم

لك لعمى ....!!!!  لعمى ...!!!!  لعمى

 

شبلوط : لك قسماً بالله يا سيدي إنو أغلب المواقع صار فيها هيك ، بس يا سيدي إذا الله جمع هيك عالم مع

بعضها أنا شو دخلني

 

إبليس : دخلك و نص ... فوت بإسم بنت علق الشباب مع بعض ، حط موضوع قليل أدب ، لك لسى بدي علمك

        شغلك ، خلي مواضيعك كلها حكي فاضي و حكي عالعالم ، لك ما كان و لا صار الموقع اللي بدو يجمع

ناس ببعضها على الحب و الأخوة و النصايح و التعليم  و أنا عايش

           رووح ولا إنت و ياه يقطع عمرك و عمره ، صيحولي على بللوسة و الله ما بيفش خلقي غيرها

 

يجلس إبليس و هو يمسك بذقته مفكراً

 

ينادي شبلوط و لخبوط بينما يبتعدان : بللوووسة ، بللوووسة ، بللوووووسة ، بللوووسة ، بللوووووسة

 

و تستمر يا  سيداتي و يا سادتي الكرام محاولات إبليس للقضاء على كل موقع أو وسيلة تعارف يتم من خلالها

تبادل الحب و الصدق و المعرفة بعد أن فزع إبليس من تناقل أخبار عن موقع يدعى تراترو إلتقى أعضاءه على

الحب و الإخاء و المعرفة

 

alt


و دمتم بخير


قصة سناريو و حوار
أخوكم 

بشار الدمشقي

Posted: 8/6/2010 - 5 comment(s) [ Comment ] - 0 trackback(s) [ Trackback ] - 3 Votes
Category: حياة

إخوتي و أخواتي الأعزاء في تراترو أقدم لكم قصة الفتاة فاتنة قصة قصيرة و لكنها رائعة

بسم الله الرحمن الرحيم

 

كانت فاتنة فتاة صغيرة في المرحلة الإبتدائية
 

ليست ممتازة بدراستها كفاية و لكنها محبوبة بين رفيقاتها
 

فاتنة الطفلة الجميلة  الرقيقة التي إذا نظرت إليها بتمعن أبكيتها
 

خلال أيام الدراسة  رأت عاملة المدرسة منظراً متكرراً من فاتنة حيرها
 

حيث كانت هذه الفتاة تدخل إلى المدرسة بحقيبة عادية و تخرج و حقيبتها ممتلئة بشكل ملحوظ
 

الأمر الذي دفع العاملة إلى إخبار المديرة التي طلبت من فاتنة أن تأتيها عند إنتهاء الدوام مباشرة
 

و فعلاً تأكد كلام العاملة إذ كانت حقيبتها مليئة بشكل مبالغ فيه
 

طلبت المديرة من فاتنة فتح حقيبتها
 

تأتأت فاتنة قليلاً و ترددت ثم و بعد صراخ المديرة فتحت حقيبتها و بدأت بالبكاء
 

صدمت المديرة من المنظر الذي رأته
 

قالت : لماذا يا فاتنة ؟؟ لماذا يا حبيبتي ؟

 

alt

 

 

 

 

 

كانت حقيبة فاتنة ملئية بفتات الخبز و بقايا سندويش صديقاتها التي تجمعه ليأكله إخوتها و أمها
 

إستمرت فاتنة بالبكاء  و قالت للمديرة بلغة الأطفال :

آنسة لا تقولي لرفقاتي ما بدي حدا يضحك علي ، بس ما  في حدا بيعطينا أكل آنسة ، و الله ما بقى عيدها .

 

كلمات بريئة شقت قلب مديرتها التي تعهدت بإطعام العائلة بعد أن تبين لها عدم قدرة الأم على العمل


و لم يكن لهم معيل سوى الله

 

 

ما حدثت هذه القصة إلا لأننا صرنا ننسى أن نهتم بأمور جيراننا
 

و نتفقد أحوال بعضنا البعض
 

 

 

 

أخوكم

بشار الدمشقي

Posted: 6/6/2010 - 12 comment(s) [ Comment ] - 0 trackback(s) [ Trackback ] - 0 Votes
Category: حياة

كلام بصيغة الغائب مو موجه لحدا من إخواتي (alt بتراترو alt) لأنكم الأحسن

 

شوية شغلات بيساويها البعض نلقي عليها الضوء

 

 

 

------- بصراحة ------------- 

لما بتروح للصراف و بتسحب مصاري وبيسألك الصراف هل تريد الحصول على إيصال للعملية

تقوم وبكل ثقة تضغط نعم

وتطلع المصاري وتاخذها ويطلع الايصال وتسحبه وترميه في الارض


هذا شو معناااااه؟؟

بصراحة : أنك إنسان وسخ و قليل زوق.

 

 

 

------- بصراحة ------------- 


لما الناس واقفين عند الاشارة قبل خط المشاة وبتجي حضرتك

من جهة اليمين وتوقف قدام الكل وفوق خط المشاة واحيانا بعده

هذا شو معنااااااااااااه؟؟

بصراحة : انت متخلف و قليل زوق.

------- بصراحة ------------- 

 

 

لما تاخذ ولادك  للمطعم وتقعد على الطاولة تطلب وتترك ولادك تسرح وتمرح في المطعم

وتزعج الناس الرايقة اللي جاية تغير جو وانت كانك ما بتعرف ولاد مين هدول  ما لك علاقة


هذا شو معنااااااااااه؟؟

بصراحة: إنك قليل زوق  و ما بتعرف تربي.

 

 

 ------- بصراحة -------------

لما تكون معزووم والا طالع عالسوق بتلبس أحلى ثيابك وبتتعطر احسن عطر

لكن لما تروح عالصلاة بتلبس تياب النوم و شحاطة و ما بتروح غير آكل توم.

هذا شو معناااااااااااااه ؟؟

بصراحة : أنت منافق و قليل زوق.

------- بصراحة ------------- 

 

 

لما تلبسي تياب مخصورة  و قصيرة والعطر ريحته من بعد كيلو وفي المحلات ضحكتك لاخر الشارع مع البياع

هذا شو معناااااااااااااه ؟؟

بصراحة: إنك إنسانة فلتانة و قليلة زوق.

 

 

 ------- بصراحة -------------

لما ينغلب فريقك اللي بتشجعه بتصير طول الوقت منرفز

بتروح عالبيت وتخانق اهلك وبتروح عالشغل مقفلة معك لا  حدا يحاكيني و تخانق و تصرخ .

هذا شو  معنااااااااااه؟

بصراحة: عقلك صغير و قليل زوق

 

 ------- بصراحة -------------

لما بتروح تدفع فاتورة الهاتف أو الكهربا

بتنط فوق روس الخللايق و إذا حدا حكى  شي أنت جاهز للمشاكل

هذا شو معنااااااااااااااااااه ؟

بصراحة : إنت فوضوي و قليل زوق

 

 ------- بصراحة -------------

لما بيجي رمضان و بتفكر تفضل علينا و تصوم

ما بتقبل حدا يحاكيك و إذا حدا قلك شي بتقلو ( اللهم إني صائمalt) بحيث يفهمها السامع  روح أحسن ما أعصرك

و بتفش خلقك بالكل مشان السيجارة و بتسب قبل المغرب بدقيقة
هذا شو معنااااااه ؟
بصراحة : تضرب من بين الصايمين شو قليل دين  زوق

 

 ------- بصراحة -------------

لما بتركب باص و بتقعد على كرسي و بتوقف جنبك آنسة
بتقعد بتتفحصها من فوق لتحت و بعين جأرة و ما بيخطر على بالك تقوم
و إنت عما تقول لحالك : حلو عني خليها واقفة تعبان أكتر منها
هذا شو معنااااااااااه ؟
بصراحة : إنك قليل نخوة و زوق

 

 ------- بصراحة -------------

لما بتطلع مع شوفير تكسي معتر
و بتاخده و بتجيبه متل كأنه شوفير اللي خلفك روح من هون تع من هون
و بالآخر  بتعمل مجزرة لأنو أخد خمس ليرات زيادة
هذا شو معنااااااااااه ؟
بصراحة : إنك بخيل و قليل زوق

------- بصراحة -------------

الحكي كتير مشان هيك بصراحة ما بدي تملوا مني

 


 

 

------- بصراحة -------------

 

 

 

Posted: 4/6/2010 - 10 comment(s) [ Comment ] - 0 trackback(s) [ Trackback ] - 3 Votes
Category: حياة

altكيفكم يا جماعة

أنا بخير الحمد لله إذا حابين تسألوا

هلأ بصراحة بدي رأيكم على سؤال مهم مين أحلى نانسي و الا هيفا

هلأ الفهمانين متلكم أكيد جوابهم رح يكون شو هالسؤال السخيف

بس المشكلة اللي مبتلين فيها إنو شبابنا صاير تفكيره محصور بسخافات من هالنوع

امبارح بتوصلني رسالة من شبكة سيريتل المحترمة قال شو

صوتوا مدري لمين مشان ير بح بسوبر ستار

يالله صار معي زنطارية و ضربتني البردية من هالخبرية مع إنو نحنا بعز الصيف

لك مشان الله حاجتنا تخلف و الا شورأيكم

alt

نانسي أحلى وإلا   

alt

Posted: 24/5/2010 - 11 comment(s) [ Comment ] - 0 trackback(s) [ Trackback ] - 2 Votes
Category: حياة

مرحبا شباب

مرة بأحد سنين الدراسة كان في بنت جمعني معها الإعجاب المتبادل

و يمكن كنا متفاهمين بكتير مواضيع و بأحد

جلساتنا بمقهى من مقاهي الشام العتيقة فاجأتني بسؤال : شو آخر علاقتنا

بصدق ما فهمت شو قصدها ، قلت لها كيف يعني ،

قالت : يعني علاقتنا لوين مصيرها ، كمان ما فهمت أو يمكن

حاولت ما أفهم ، حاولت توضحلي لي أكتر

قالت : بشار يعني إنت مفكر إنو نتزوج ?

جوابي : ليه بدنا نتزوج

قالت : يعني عاجبتك علاقتنا

جوابي : شوبها علاقتنا و الله مننحسد أحلى صديقين بالدنيا

قالت باستهجان : أصدقاء !!! نحنا ما عنا هيك ، و مو من عاداتنا الصداقة ،

و أصلاً الصداقة عيب بين الشب و

البنت

انشليت و قلت : شو مشان قعداتنا و روحاتنا و صدقنا و أفكارنا ، معناها كل لقاء جمعنا عيب

كملت الإنفجار : إي كل طلعاتنا عيب و كل علاقتنا غلط إذا ما كان الهدف الزواج

 

يعني سؤال إذا كانت علاقة البنت بالشب عيب فأكيد خوف عالبنت مو عالشب

و إذا كان هيك معناها البنت متل أي

طفل ممكن أي حدا يضحك عليها و كمان عيب يكون في إختلاط بالمدارس

و بالجامعات و بدوائر الدولة و ما بعرف

شو كمان

أنا رأيي البنت متل الشب إنسان عندها عقل يفكر و قلب يحب و مشاعر تحس

لازم تكون بتعرف الصح من الغلط و لازم تكون قادرة إنها تحمي نفسها

و إلا خليها ببيتها أحسن و أضمن لسلامتها

بس هلأ عن جد ممنوع يكون في صداقة بين شب و بنت متل أي صداقة بين بنتين أو شبين

الجواب عندكم

Posted: 20/5/2010 - 7 comment(s) [ Comment ] - 0 trackback(s) [ Trackback ] - 0 Votes
Category: حياة

مرحبا كيف الحال

هلأ في جمل كتير منسمعها متل ، لو الدولة عملت ، لو الدولة ساويت ، الموظف الفلاني مرتشي ، الموظف الفلاني

مهمل

خلونا نحل هالمشكلة

أولا مين هي الدولة : الدولة هي الشعب

الشعب مين : الشعب أنا و إنت أخي و أخوك أبي و أبوك

يا جماعة الموظف بدولتنا مو باكستاني و لا هندي و لا صيني الموظف متل و متلك سوري بس تربيته غلط

يعني لو أنا و إنت عرفنا نربي ولادنا عالأخلاق و القيم رح يجي يوم يكون ولادنا موظفين هالدولة ، و رح تكون

دولتنا متل ما منحب و أكتر أما نقول الحكومة و الحكومة و لازم تقمع الرشوة و الفساد و ال و ال و ال لك والله لا

حكومتنا و لا حكومات الدنيا بتقدر تسيطر على ظاهرة الفساد إذا ما تدخل البيت و الأسرة الأسرة هي العامل الأكبر

و الأقوى بالقضاء على هالمشاكل مرة صادفت موظفة عرفوا أهلها يربوها و الله يا جماعة حسيت بإنسانيتي و

بأهميتي كمواطن كلماتها كانت : كيف بقدر ساعدك عيونها بعيوني يعني أدت مهامها كموظفة و كإنسانة و بدون

مقابل

لو كانوا الكل هيك

بيكونوا إذا قدرنا نربي ولادنا على هالأخلاق

كلامي غلط

بشار

Posted: 3/5/2010 - 0 comment(s) [ Comment ] - 0 trackback(s) [ Trackback ] - 0 Votes
Category: حياة

أقدم شاب في الثلاثين من عمره على قتل شقيقته المتزوجة والبالغة من العمر 39 عاماً طعناً بالسكين بذريعة الشرف، وذلك صباح السبت في قرية البثينة التابعة لمحافظة السويداء.

 

alt
 

وقال أحد أهالي القرية فضل عدم الكشف عن اسمهإن "الشاب أقدم على فعلته بسبب غضبه من شقيقته

التي هربت مع شخص من محافظة حلب تاركة زوجها وأطفالها الأربعة لمدة أربعة أشهر"، مشيراً إلى أن "عناصر

الأمن الجنائي في حلب ألقوا القبض عليها وسلموها إلى فرع الأمن الجنائي بالسويداء".

وأضاف "حُكم عليها بالسجن لمدة ثلاثة أشهر، وكان شقيقها يزورها في السجن ويلبي لها كل احتياجاتها ويطمئنها

بأنه صفح عنها، وبعد إطلاق سراحها عادت إلى بيت أهلها, حيث قام شقيقها بقتلها".

من جهته, قال مصدر في شرطة السويداء لسيريانيوز إن "الشاب طعنَ شقيقته بسكين حاد أكثر من 30 طعنة

بالرقبة والصدر والظهر والبطن مما أدى إلى وفاتها على الفور"، مضيفا ان "القاتل قام بتسليم نفسه واعترف

بجريمته".

بدوره، قال الطبيب الشرعي عماد نوفل أن "سبب الوفاة يعود إلى النزف الصاعق الناجم عن الأذيات الوعائية

والحشوية الناتجة عن طعنات السكين".

يشار الى أن الرئيس بشار الأسد أصدر مؤخراً مرسوماً تشريعياً عدل بموجبه المادة 548 من قانون العقوبات حيث

تم إلغاء العذر المحل لمرتكبي جرائم الشرف ومنحهم عذراً مخففاً على ألا تقل العقوبة في حالة القتل عن الحبس

عامين.

كما تم إلغاء الفقرة الثانية من المادة 548 التي كانت تمنح عذراً مخففاً للفاعل في حال فاجأ الفاعل زوجته وأحد

 أصوله وفروعه وأخته في حالة مريبة مع آخر

ما رأيكم بهذا الخبر

الخبر منقول من موقع  سيريانيوز .


« Last Page  |  viewing results 1-15 of 20  |  Next Page »