عنجد انت واحد غليظ
على مدى حياتنا منصادف الكثير من الأشخاص
الي بيكونو حبابين
لطيفين
محترمين
حوش
مجرمين
منحب ومنكره
كتير ناس
بس النمط الي بيرافقنا على طول حياتنا ومالو حل
هوه الغليظ
يعني هاد الإنسان الغليظ
من نعومة اظافرك بتلاقيه بوشك
ومن اول زيارة بتلاقي عم يتغالظ عليك وانت بالإندائة
مثلاً بيمسك اللهايه من تمك وبيدحشها بأنفك
لحد ماتصير فتحت انفك 8 انش
بتكبر شوي
وبيجي غليظ غيرو من نوع تاني يعني
من النوع انو بيسرق العابك
وبيضربك لانو هو كبير
ولما تضربة بيركد عم يبكي لعند امه
وانت الي بتاكل القتلة
وبتكبر ويستمر مشوار الغلاظة
وبتفوت على المدرسة
وبيطلعلك الغليظ من نوع انا شاطر
يخرب بيتو هاد
بيضل مرافقك روضة ابتدائي اعدادي
ثانوي معهد جامعة
يخرب بيتو شوغليظ
لك مو بس غليظ كمان فسفوس
هاد الزلمة بيعكرلك
حياتك وبيتميز بحبو الشديد
للمقعد الأول
وباصبعتو الطويلة الي بيدحشها بكلشي
وبصوتو الغليظ الي بيقشعر البدن
اكثر من خط التوتر العالي
من النوع الي بيحب يتميز
ويورجي حالو انو متميز
ولو بيصحلو يحط حبل
زينة حول راسو منشان
يلفت نظر مابيقصر
وتستمر الغلاظة مع استمرار الحياة
يعني ممكن تطلع بالمكرو وتسمع بقى الغلاظة
من الإذاعات
دو ري مي فا صو لا سي
بلشو الإعلانات
انو ياربي شو دخل هالحكي بالإعلانات
ما عم اقدر اعرف شو القاسم المشترك بين
الإعلانات و السلم الموسيقي
او ممكن تشوف غلاظة من نوع تاني
مثلاً
من المعروف انو الشعب العربي مولع بالشعر
والقافية
لما تطلع على الميكرو
وتلاقي مكتوب على الباب
انا الباب بفتح وبسكر لحالي
يعني الباب يفتح من عند السائق ما بيمشي
حالها هي هئ مالها فكاهة ولامازية
او ممكن تفوت على شي محل
وتلاقي الدين ممنوع والعتب مرفوع والرز منقوع
ومابعرف شو
وحج مبرور وسعيا مشكور وصحننا مكسور
انو
هي غلاظة مو شعر هاد
او ممكن تشوف غلاظة على المستوى الدولي بقى
انو امسكي العلبي وضعي القليل من الشامبو على
فروة الرأس ودلكي
دلكي حبيبتي دلكي
طيب اول الشي بدي اتشكر هالشركة
على هالملاحظة الرهيبة الي مندونها
مابعرف شو كنت عملت لما شوف قارورة شامبو
يمكن كنت شربتها
او حطيتها على وش الحمص بلبن
وتاني شي
شو هي امسكي
ودلكي
يعني شو الشباب مافي شامبو يعني
ولا شو
كمان ممكن تشوف غلاظة تجارية
لما بيجي عمو البياع وبيعطيك فاتورة
بـ 5599
شو حبيبي
يعني مو 5600
ولا لما يعطيك الفاتورة ويكتب بالأخر
فقط لاغير
بالله
يعني مو عاجبك ولا مسترخص انت يعني
لك كان لازم تكتب بالأخر اففففففففف ولي يامحمد
غليظ متميز كتير وهو الي بيروح
على الكومبيوتر وبيبدع بقى بشي غنية
ولاشي فيديو وبيحط باسم الأغنية
بجانب اللاحقة والأسم
اسم ورقم تلفونو
وبيبلش ينشرها مع صحابو
انو شو منشان
تضرب انت وغليظ البلوتث
وعندكن كمان
الغليظ الحربوق هاد بقى
بيزت كلمه او بيكتب تعليق
وعلى اساس شو انو يابي هو الفهمان
وماحدى عرف شو قصدو من الي كتبو
ولا غليظ الأمثال
بيقلك وشو مابيضحك للرغيف السخن
انو شو يعني انا لازم كل ماامسك رغيف
حكومي اقلب على مؤخرتي من الضحك
طيب الفران شو بيعمل بعمرو هاد
تخيلو كل ما تمرقو من جنب فرن
تلاقو حاله هسترية من الضحك المتواصل
لك أخخخخخخخخخخ شو بدي اكتب لأكتب
عن هاد ولا عن هاد بس بالأخر يمكن انا أغلظ واحد فين
لأني تارك الدنيا وعم اكتب عن الغلظان
وحقكون علي